Коронавирус дене кылдалтше ситуацийын мониторингше шотышто увер рӱдерын палемдымыж почеш, пандемий тӱҥалме жап гыч 25 май йотке Российыште COVID-19 дене черланыме 353427 (+2,6%) случайым регистрироватлыме, пытартыш суткаште – элнан 83 регионыштыжо 8946 случайым.
Пандемий пагытыште Юл кундем федеральный округышто у коронавирус инфекций дене черланыме 32716 случайым (элыште регистрироватлыме чумыр чот гыч 9 процент) рашемдыме. Эн шуко черле – Нижегородский областьыште (25%), Татарстан Республикыште (9%), Башкорстостан Республикыште (8%), Саратов областьыште (8%) да Чуваш Республикыште (7%), эн шагал – Удмурт Республикыште (2%). Пытартыш арняште поснак шуко (54%) черланышым Пенза областьыште регистрироватлыме, тиде показатель Мордва Республикыште эн изи (17%).
19-25 майыште округысо инфекционный стационарла гыч паремше 4772 еҥым мӧҥгӧ колтымо.
Юл кундем федеральный округышто у коронавирус инфекций деч чылаже 223 черле колен. Российыште тиде показатель кокла шот дене 1,03 процент гын, округышто – 0,68%. Эн шуко еҥ (2,27%) Удмурт Республикыште илыш гыч каен, эн шагал (0,31%) – Ульяновск областьыште.
Округышто COVID-19 дене черланыме чот ончычсо семынак кушкын толеш, сандене тудын регионлаштыже 31 май деч вара посна улмо режимым кораҥдат але уке, чараклыме мере-влакым луштарат але уке – калык дене кылдалтын.
М.ИВАНОВА
