13 декабрьыште Йошкар-Олаште классический шахмат дене пӧръеҥ-влак коклаште республикын чемпионатше иктешлалтын. Тушто 10 ияш Максим Волков Марий Элын эн самырык чемпионжо лийын. Тыгайже республикнан историйыштыже икымше гана палемдалтын.
Турнир 5-13 декабрьыште «Арена» манежыште эртен. Индеш раундышто уста рвезе шым очком поген. Тынарак очком эше ик шахматист (Александр Бушков) налын.
Ты гана таҥасымаш моткоч виян лийын. Ончыко лекшаш верч кандаш спортсмен, ойыртемалтын, ӱчашен. Чылаже 32 шахматист уш-акылжым пудыратылын.
Палемдаш уто огыл: тылзе ончыч М.Волков 10 ияш марте спортсмен-влак коколаште тӱнямбал первенствын бронзо призёржо лийын.
Е.Эшкинина.
