УВЕР ЙОГЫН

«Элнетым» пырля лудына

Марий сылнымутлан негызым пыштыше С.Г.Чавайнын шочмыжлан 130 ий теммыллан С.Г.Чавайн лӱмеш национальный библиотек у медиапроектым пашаш колтен.

 Тудо «Сергей Чавайнын «Элнет» романже гыч ужаш-влакым лудына» маналтеш. Кажне кумылан еҥ роман гыч ужашым лудын, тидым видеош войзен да библиотекын электрон адресышкыже колтен кертеш. Проект иктешлалтмеке, тудым «Сергей Чавайнын «Элнет» романже гыч ужаш-влакым лудына»   видеоресурсыш чумырат да лудмыверын сайтышкыже, тыгак социальный сетьлаш вераҥдат.

Ты произведенийын пӱрымашыже оҥай. Икымше ужашым автор 1934-1935 ийлаште возен. 1936 ийыште роман Москваште савыкталтын. Кокымшо ужашыжым тудо 1937 ий 8 апрельыште возен пытарен. Но тудо ийынак 25 майыште писательым пуйто «контреволюционный националистический группировкышто участвоватлымыжлан» титакленыт да 11 ноябрьыште лӱен пуштыныт. Тудын архившым да кид дене возыман произведенийже-влакым пытареныт. Но романын кокымшо ужаш рукописьше ӱмбаке ала-кӧн «Рукопись на цыганском языке» манын серен шындымыжлан кӧра аралалт кодын.

 Роман Юл эҥерыш ушнышо марий эҥерын — Элнетын — лӱмжым нумалеш. Тичмаш вӱдан ты эҥер гаяк произведенийын сюжетше марий калыкнан кугу исторический йыжыҥжым авалта. Тудо 1911-1915 ийласе марий ялын илышыжым почын пуа. Столыпин пагытысе аграрный реформо дене кылдалтше тӱрлӧ социальный лончыш пурышо кресаньык-влак кокласе вашпижмаш нерген каласкала.

 «Элнет» шукертак возалтын… Марий сылнымут кеч-могай у кӱкшытыш шуэш гынат, С.Г.Чавайнын тиде произведенийже икымше семын кызытсе лудшым садак тургыжландараш тӱҥалеш.

 Акцийым эртарыме условий нерген библиотекын сайтыштыже рашрак пален налаш лиеш.

 С.Носова.

Опубликовать в Одноклассники

Добавить комментарий