ТРАНСПОРТ

Ынде чыла машина пурен кертеш

Марий Элысе ОНФ-ын чолга еҥже-влакын тыршымышт дене Звенигово районысо Мочалище посёлкын рӱдӧ уремысе кугорныжым лум да ий деч эрыктеныт. 

Корнын лум лапашыш савырнымыже, тидлан кӧра продуктым шупшыктышо машинан кевытыш, мусоровозын шӱкшакым погымо площадкыш, моло техникын социальный объектлаш пурен кертмышт шотышто вуйшиймашым ОНФ-ыш верысе-влак возеныт, тиде фактым фото дене пеҥгыдемденыт.

«Тиде сигналым ОНФ шотыш налын да «Лум фронт» акций кышкарыште муниципалитетын администрацийышкыже колтен. Икмыняр кече гыч посёлкышто илыше-шамыч рӱдӧ уремым спецтехникын эрыктымыж да ынде чыла машинан шуко вере пурен кертмыж нерген куанен увертареныт», – каласкала ОНФ-ын «Лӱдыкшыдымӧ да качестван автомобиль корно» тематический площадкыжын модераторжо Валерий Ершов.

Ушештарена, Марий Элысе ОНФ 27 декабрь гыч 28 февраль йотке «Лум фронт» мониторингым эртарен. Шокшо линийыш чылаже 93 вуйшиймаш пурен. «Фронтовик-шамычын»  тыршымышт дене 68 объектыште корным шотыш кондымо.

М.ИВАНОВА.  

Опубликовать в Одноклассники

Добавить комментарий