Звенигово оласе ечыгорно тений гыч электротул дене волгалтаралтеш.
Ечыгорнын ик километр утла кутышыштыжо светодиодан коло светильникым чӱктымӧ, да ынде ечызе-влак стадионысо старт гыч трассе мучашысе финиш марте кастенат коштын кертыт.
Звенигово ола администрацийын увертарымыж почеш, «Жилищный управляющий компаний» ООО-н пашаеҥже-влак ече трассе мучко латиндеш у меҥгым шогалтеныт да кажнышкыже светодиодан светильникым сакеныт. Тиде пашалан 73 тӱжем теҥгем кучылтыныт.
Трассыште олаште, республикыште илыше але кундемышкына унала толшо кажне еҥ коштын кертеш.
Ечыгорнысо электротул ола уремысе дене ик жапыште чӱкталтеш да йӧрталтеш.
Палемдыме маршрут дене ечызе ден биатлонист веле огыл, скандинав ошкылмаш дене кошташ, куржталаш йӧратыше-шамычат пайдаланат.
М.ИВАНОВА
