Профессионал пайремышт вашеш 16 июньышто Марий Эл вуйлатышын пашажым жаплан шуктышо Александр Евстифеев республикысе медицине пашаеҥ-влакым саламлыш.
Тиде кечылан пӧлеклалтше торжественный погынымаш Йошкар-Олаште, Сеҥымашын ХХХ идалыкше лӱмеш тӱвыра полатыште, эртыш. Тушко шке пашаштым ик эн сайын шуктышо медик-влак чумыргеныт ыле.
Медицине пашаеҥ-влакым саламлымыж годым Александр Евстифеев палемдыш: тиде пайрем – уло калыкын пайремже, молан манаш гын медицине пашаеҥ-влакын полышыштлан эҥертыдыме еҥым уло тӱняштыжат от му гаяк. А медиклан ышташ кӱкшӧ профессионализм веле огыл кӱлеш, тыгак пытыдыме шӱм-чон вий-куат, умылымаш да чытыш лийшаш. Ешыште пиал медицине пашаеҥ-влак денат кылдалтеш.
Поро тыланымашым ойлымыж деч вара тудо здравоохраненийын эн сай пашаенже-влаклан, куд еҥлан, кугыжаныш наградым, вич еҥлан Марий Эл Республикын правительствыжын Чап кагазшым да ныл пашаеҥлан Тауштымашым кучыктыш.
Л.Камалетдинова.
