Татарстан Республик Агрыз район Терса ял гыч чолга марий ӱдыр Алина Ипоева дене палыме лияш темлем. Школым тудо шöртньö медаль дене тунем пытарен. Кызыт Казань федерал университетын Елабугысо институтыштыжо филологий да историй факультетыште 5-ше курсышто шинчымашым пога. Тудо самырык поэтессе.
– Алина, сылнымут корнет дене палдаре.
– Кандаш ияш годымак шÿм-чоныштем поэзий шÿлыш ылыжын. Лишыл айдеме, мотор вер-шöр нерген возкалаш тÿҥалынам. Ий гыч ийыш блокнотыштем у почеламут-влак шочыныт, шукемыныт. Нуным шкенан кундемысе газетыш, йоча журналыш колтен шогенам.
Луымшо классыште тунемме годым «Музыка души» икымше почеламут сборникем, руш, марий, татар йылмыла дене савыкталт лектын. Тидлан Татарстанысе Писатель ушемын еҥже Чингиз Мусинам, поэтессе Асия Курбангалиевам да йöратыме авай ден ачам тауштем. Тыгак мый Россий, республик, район кÿкшытан тÿрлö усталык таҥасымаште виемым тергенам. Пашам ятыр сборникыште савыкталтын. «АРТ-Сияние» савыктыш пӧрт шукерте огыл 46 авторын пашаштым чумырен, «Искусство в жизни» книгам луктын. Тыште икмыняр почеламутем верланен. Мыйын нерген возымышт годым, тӱҥалтыште марий улмемым ончыкташ йодынам. Тиде мылам тӱҥ, молан манаш гын мый шке тукымем, калыкем дене кугешнем.
– Кунам пашатым аклат — тиде пеш кугу куан.
– 2013 ийыште Андрей Вознесенский лӱмеш степендиат лийынам. Тыгай стипендий кажне ийын сылнымут корным ойырышо, кӱшыл шинчымашым налше 10 студентлан пуалтеш. Кодшо ийын Сажида Сулейманова лӱмеш литератур премийым кучыктеныт. Тидыже сылнымут аланыште умбакыжат тыршаш тарата.
– Возымет гоч тыйым пален налаш лиеш?
– Шонымашемым, тургыжланымашемым почеламут корныштем почын ончыктем. Тӱҥ геройжо шкак улам. Шукыж годым лирикым возем. Ковайын марий ялже, шочмо кундем, шӱлык у почеламутым возаш кумылаҥдат.
– Тый кызыт могай сомылым шуктен шогет?
– Елабуга олаште «Серебрянный век» музей–заповедникыш коштам. Тушто литератур клубын еҥже улам. Тиде Российысе да вес элласе поэт, писатель-влак дене вашлияш йӧным пуа. Тыгак возкален шогем.
Кызыт Елабугысо институт гыч 7 студент Чехийысе Касвел Богемий университетыште стажировкым эртена.
Шергакан, поро калыкем,
Шочмо вер – кундемем,
Мый тыйым йӧратем,
Куаналын мурем.
Ласка марий мурым
Эреак шарналтем.
Лыжга марий семым
Тыланет тарватем.
Изи кайык семын,
Чоҥештал, йолташем.
Улат мылам порсын –
Ну кузе мый мондем?
О.МОШКИНА
