1 март гыч «Шыргыжмашым весе дене «пайле» социальный рекламе дене республикысе конкурс эрта. Тудо калык-влак кокласе вашкылым пеҥгыдемдаш полшышаш. Ты проектым ПГТУ-н Марий Элысе национальный да конфессиональный шымлыме рӱдерже, «Интеллектуал» АНО, Марий Элын Тӱвыра, печать да калык-влакын пашашт шотышто ден Образований да науко министерствылаже эртарат.
Конкурсыш 14 ияш гыч 30 ияш марте ӱдыр-рвезе-шамыч ушнен кертыт. Нуно «Социальный плакат» ден «Социальный видеоролик» номинацийлан рекламым ямдылышаш улыт. Йодмаш ден пашам 1 октябрь марте kuklina-10@mail.ru электрон почтыш «Конкурс социальной рекламы «Поделись улыбкою своей» пале дене колтыман. Лекше йодышым 8-917-703-66-24 телефон номер дене рашемдаш лиеш.
Марий комикс
Республикыштына комиксым шочмо йылме ден сӱретлыме курс-влак лийыт. Тудо «Илыше йылме» проект почеш эртаралтеш. Проектым Финляндийын Москвасе посольствыжо илышыш шыҥдара. Занятийым финн сӱретче Санна Хукканен ден кусарыше, комиксым сӱретлыше активист Анна Воронкова вӱдат.
Эртарыме мастер-класс-влак йомын толшо йылмым арален кодаш, вияҥдаш полшат. Курсыш толшо-шамыч комиксым сӱретлаш, сценарийым возаш тунемыт, тыгак ты шкешотан искусствым туныктымаште кучылт кертме нерген мутланат. Занятий руш да финн йылмыла дене эртат, но комиксым шочмо йылмым кучылтын сӱретлат.
Майыште проектым иктешлат. Финн-угор йылмыла дене шочшо комикс-влакын выставкыштым «КоМиссий» фестивальыште ончыктат.
Тыгай мастер-классым Петрозаводскышто, Ижевскыште, Кудымкарыште, Ханты-Мансийскыште эртарыме. Мемнан дене шочмо йылме дене комиксым 21 мартыште Йошкар-Олаште, 22 мартыште республикнан ик районыштыжо сӱретлаш лиеш. Ты курсыш ушнаш кумылан-влак йодмашым kuklina-10@mail.ru электрон почтыш колтен кертыт.
Л.ШАБДАРОВА.
