УВЕР ЙОГЫН

Шымлыме да рашемдыме корнышто

Марий кугыжаныш университетын, «ТестГен» компанийын да СПИД ден инфекциян тӱрлӧ чер дене кучедалме, нунын дене черланыме деч профилактикым эртарыме республиканский рӱдерын еҥже-влак пашам пырля ыштыме нерген мутланеныт.

Вашлиймаште МарГУ-н медицине факультетшын да «ТестГен» компанийын пашаштышт «онкологийыште диагностике», «таргетный терапийым палемдыме амал», «генетический пренатальный диагностикым ыштымаш» гай ончыл направлений-влакым  лончыленыт.

 Мероприятий Марий кугыжаныш университет да «ТестГен» компаний ден СПИД-рӱдер кокласе келшымашым пеҥгыдемдыме дене мучашлалтын. Тиде событий айдемын тӱрлӧ чержым ПЦР (полимеразный цепной реакций) йӧн полшымо дене лабораторийыште  да молекулярный генетике йӧн полшымо дене практический лабораторийыште диагностироватлыме пашам палынак вияҥден колтышаш.   

«ТестГен» ООО-н генеральный директоржо Андрей Тороповскийын умылтарымыж почеш, тиде документ шымлыме да моло мероприятийым пырля эртарыме, грант конкурслаш, тыгак научно-шымлыме да опыт-конструктор паша программылаш ямдылалтме да йодмашым пуымо пашам пырля шуктымо нерген ойла. «Тылеч посна науко подразделенийлам пырля почаш, научно-шымлыме уверым иквереш лончылаш, университет велымат, «ТестГен» могырымат квалификацийым нӧлташ да стажировкым эрташ йӧным ышташ палемдыме», – рашемден вуйлатыше.

Вашлиймаш годым «ТестГенын» генеральный директоржо компанийын тӱрлӧ продуктшо да пашаж дене палдарен, поснак диабет ретинопатий да генетический гистологий шымлымаш нерген радамын каласкален. Вашла мутланыме годым диабет ретинопатий шотышто шымлымашым пырля эртараш палемдыме.

«ТестГен» компаний Казань, Самара да Ульяновск олаласе вӱдышӧ кӱшыл тунемме тӧнежла дене кылым куча.

М.ИВАНОВА

Опубликовать в Одноклассники

Добавить комментарий