ЯЛОЗАНЛЫК

Шыже тургым: «Пасуэш нимоат ок код», — маныт Шернур районысо «Земледелец» ялозанлык артельыште

Озанлыкын рӱдӧ илемже – Чылдемырышке  — кайыме корно пелен   нулал налме гай чара пасум ужын, тыште уржа-сорла тургымым мучашленыт, очыни, манын шонымаш лекте. Шурнывечыште отыл да южо вере пӱтырен чумырымо чӱчкыдын шогышо тюк-влакын гына шинчалан пернымышт тыгай шонымашлан амалым пуыш. Но озанлыкын идымже воктеке лишеммеке, ужна: тачысе кечылан ик тӱҥ паша тышке куснен улмаш. Озанлыкын агрономжо Алексей Богдановым лач тыштак ужна. Тудак тачысе кечын уржа-сорла кузе кайыме нерген каласкалыш. Тидын нергенак весовой пырдыжыште кечыше сводко гыч пален налаш лиеш, тудо кажне кечын уэмдалтеш. 

— Тений 2200 утла гектарыште шурным поген налман. Тышеч 590 наре гектарже — уржа. 114 гектарже — кокияш шыдаҥ. Тачысе кечылан (ме озанлыкыште 28 сентябрьыште лийынна –авт.)  690 гектарыште шияш кодын. Эн кугу кумдыкшым  ик ияш ош шыдаҥ айла, викым 57 гектарыште поген налаш кодын,- каласкала Алексей Васильевич. – Таче кум комбайнге  икияш шыдаҥ пасушто шурным пога. Тушто шуко кодын огыл, пытарат да вигак вес пасуш куснат. Пырче лектыш, тенийсе игечым шотыш налын, удажак огыл. Уржа гектар гыч 20, шож 17 центнер дене лектыт. Кокияш ош шыдаҥын лектышыже изирак, 14 центнер гына, телым начар чытен лектын. Икияш ош шыдаҥ пасуат кажне гектарлан шотлымаште 20 центнер дене пырчым пуа. Чумыр лектыш кодшо ийысе деч сайрак. Шошым ӱдымӧ годым ӱяҥдышым пуымо, озым лекмеке, ик гектарлан шотлымаште 100 килограмм ӱяҥдыш дене подкормкым ыштыме. Тиде сай шӱкалтышым ыштен.

 Агрономын мутшо почеш, тений озанлык уржа-сорлам 19 августышто веле тӱҥалын, моло ийлаште ты жаплан шурнывечын пелыже ярсен шуын ыле. Пырчыжат ик семын шуын огыл. Тений пасуш  икымше кечын уржа деч ончыч шушо шожым погаш лектыныт.

 

Кумданрак — «Марий Эл» газетын
2017 ий 3 октябрьыште лекше номерыштыже лудын кертыда.

А.АНДРЕЕВ.
М.Скобелевын фотожо.

 

Опубликовать в Одноклассники

Добавить комментарий