Шуркалыше кӱртньывоштыр коклаште верланыше учрежденийлаште улшо кевытлаште тӱрлӧ кочкыш йӧрвар, арвер да ӱзгар-влак дене пырля ынде шке дене ыштыме сатумат налаш лиеш.
Кызытеш изирак ужашыже веле ужалалтеш. Тӱҥ шотышто – ургымо сату, палдара ФСИН-ын Марий Элысе управленийжын пресс-службыжо. Туге гынат тудо кугу йодмаш дене пайдалана. А лишыл жапыште, мутлан, Медведево поселкышто верланыше 3-шо номеран колонийыште сувенир сатум, таптыме ӱзгар-влакым темлаш шонат. Нуным ончыкыжым судитлалтше-влакын вашлиймашке толшо лишыл еҥышт налын кертыт.
Йошкар-Оласе следствий изоляторысо кевытыште гын посна отделым почаш да тушто Марий Элысе режимный учрежденийлаште ямдылыме сатум ужалымашке лукташ шонат. Нуным ончыкыжым республикыштына илыше кумылан кеч-могай еҥ налын кертеш. Промышленный сату деч посна тушто кӱэштме, тыгак шокшо кочкышымат ужалаш тӱҥалыт. Ты шотышто кызыт ямдылалтме паша эртаралтеш.
Л.Камалетдинова.
