УВЕР ЙОГЫН

Шужен колымо деч…

Йӱштӧ пагыт толмек, Российысе ятыр олаште социально аралалтдыме еҥ-влаклан ыраш лийме пункт-влакым почыт. Йошкар-Олаште тыгай вер уке. Но Йӱдым эртарыме пӧртын куснылшо бригадыже, Православный черкын пашаеҥже да поро кумыл фондын волонтёржо-влак суртдымо-печыдыме-шамычым ноябрь гыч март йотке арняш ик-кок гана чылт яра пукшат.   

Марий Эл Республикын Социальный вияҥмаш министерствыжын палемдымыж почеш, мутлан, Панфилов уремысе 25-ше пӧрт кумдыкышто верланыше пунктышто иканаште 30 еҥ кочкын кертеш. Кодшо ийын Йӱдым эртарыме пӧртын куснылшо бригадыже тышке 101 гана лектын да 3000 утла еҥлан шокшо кочкышым пуэн.

Йӱдым эртарыме пӧртын пашаеҥже-влак неле илыш ситуацийыш логалше-шамычым теният пукшат, тылеч посна эше социальный услугым пуат. Мутлан, паспортым налме, Йӱдым эртарыме пӧртыш логалме йӧн-влак дене палдарат. Практике ончыктен: пунктыш тӱҥ шотышто пӧръеҥ-влак толыт. Шукыштлан йӱштӧ телым шужен колымо деч утарен кодышо йӧн – тидак веле.

М.ИВАНОВА.

Опубликовать в Одноклассники

Добавить комментарий