Вӱргечын республикысе Мер-политике рӱдерыште Мер Каҥашын вуйвержын черетан погынымашыже эртен. Тушто Йошкар-Олаште 10-11 апрельыште эртышашлык XI Марий калык погыныш сайлалтше делегат-влакын спискыштым пеҥгыдемденыт. Черетан погынышто марий калыкын илышыжым ворандарен, йылмыжым, тӱвыражым вияҥден колтымо дене кылдалтше йодыш-влакым тарватат, тыгак Мер Каҥашын у составшым сайлышаш да финн-угор калык-влакын черетан конгрессышкышт делегат-влакым ойырышаш улыт.
Кызытсе Мер Каҥашын еҥже-шамычлан марий калык ончылно мутым кучаш логалеш: эртыше жапыште нунын тыршымышт дене мо ышталтын? Вуйверын погынымашыж деч вара журналист-влаклан пресс-конференций эртен. Погынлан кузерак ямдылалтме шотышто нунын йодышыштлан марий оньыжа Эдуард Александров, Марий Эл правительстве председательын икымше алмаштышыже Михаил Васютин, тӱвыра, савыктыш да калык паша шотышто министр Константин Иванов вашештеныт.
Михаил Зиновьевичын палемдымыж почеш, Марий калык погын Марий кундемын курымаш лӱмгечыжым палемдыме кышкарыште эрташ тӱҥалеш. Республик вуйлатыше А.Евстифеев шкежак тудым ямдылыме да эртарыме шотышто оргкомитетым вуйлата. Погынлан уло республик дене ямдылалтына манаш лиеш. Кучем велым ты пашам виктарымылан Тӱвыра, савыктыш да калык паша шотышто министерстве, а мер илыш велым марий Мер Каҥаш вуйын шогат.
Погыныш делегат-влакым республикыште веле огыл, тыгак Российысе регионлаште сайленыт: 1500 марий деч ик делегатым ойырымо. Ончыч ял шотан илемлаште, вара районысо конференцийлаште нуным пеҥгыдемденыт. Кызыт ты паша мучашлалтын. Ынде нине списке ден протокол-влакым чумырен иктешлыме паша кая. Пытартышлан Татарстаныште делегат-влакым ойыреныт. Чылаже сайлымашке 19 регион ушнен, погыныш 400 наре делегат чумырга. Погынын штабше але марте республикысе Мер-политике рӱдерыште лийын гын, лишыл жапыште М.Шкетан лӱмеш кугыжаныш драме театрыш кусна, палемдыш оньыжа.
А теве Марий калык погыныш толшо делегат-влакым вашлийме да Йошкар-Олаште программышт поян лийже манын, Тӱвыра, савыктыш да калык паша шотышто министерстве вуйын шога. Министр Константин Ивановын ойлымыж почеш, поян тӱвыра программе ямдылалтеш. Лӱмын пашаче группат ышталтын. Уна-влакын толмо кечын, 9 апрельыште, «Марий касым» эртараш палемдыме. Кокымшо кечын кастене делегат-влакым М.Шкетан лӱмеш кугыжаныш драме театр «Йыван Кырла» постановко дене куандара. Кумшо кечын Э.Сапаев лӱмеш опер да балет театрыште торжественный приём дене пырля кугу пайрем концерт лийыт.
Журналист-шамычат тенийысе погыныш Мер Каҥашын официальный сайтше гоч аккредитацийым эртымеке гына логалын кертыт.
С.НОСОВА
