УВЕР ЙОГЫН

Шочмо элым йӧратышт манын…

2005 ий 22 ноябрьыште Россий десантник-влак ушемын Марий региональный пӧлкажым почмо. Тений тудлан – 15 ий.

Ты ушемым Афганистаныште службым эртыше М.Фаткуллинын темлымыж почеш почмо. Тудо Марий Элысе десантник-влакым иктыш чумырен, ВДВ-ын, локальный сарлаште лийше ветеранже-шамыч ден самырык тукым, кадет, школышто тунемше-влак коклаште вашлиймашым эртарен, шкежак тӱрлӧ мероприятийлаште участвоватлен, участвоватла.

Ушемын тӱҥ задачыже: калыкым юж десант войскан боевой традицийже дене палдараш, ВДВ-ын ветеранже-влакым иктыш чумыраш.

Тиде паша илышыш пурталтын, сандене шуко вере «Самырык десантник» клуб почылтын. Тыге республикыште «Гром» военно-патриотический клуб пашам ышта. Тудлан Российын Геройжо Марк Евтюхинын лӱмжым пуымо. Клубыш латкуд ий деч кугурак рвезе-влак коштыт.

– 2005 ийыште Россий десантник-влак ушемын Марий региональный пӧлкажым почмо. Тидлан лӱмынак Москошко ушемым официально регистрироватлаш миенам. А 2013 ийыште «Гвардий» клубым почмо. Тушко 12-13 ияш рвезе-влакым налыт. Но занятий пырля эртаралтеш. «Гром» гыч рвезе-влак изирак-шамычлан полшат. Мемнан деке ӱдыр-влакат ушнат, – мане ик интервьюштыжо Марсель Динисович. – Тӱҥ задачына: самырык тукымым военно-патриотически воспитатлаш, таза илыш-йӱлам илышыш шыҥдараш, тӱрлӧ кредалмаште вуйым пыштыше-влакын ешыштлан полшаш. Тыгак тӱрлӧ мероприятийым, концертым эртараш… Такшым паша ышталтеш. Мутлан, кажне ийын Сеҥымаш кечым палемдыме годым воспитанникем-влак Курымашлык тул воктеке лектыт, парадыште участвоватлат. Ты кече лӱмешак майыште Йошкар-Ола-Кокшайск маршрут дене витле километрыш марш бросокым ыштена. Адакшым тӱрлӧ концерт группым ӱжына. Йошкар-Олаште «Голубые береты», «Гвардия», «Десантное братство» да моло мурышо группо-влак лийыныт. Тыгак спорт мероприятий эртаралтеш.

2015 ий гыч М.Фаткуллин Чечня сарысе 104-ше парашютно-десантный полкын 6-шо ротыжын региональный представительжылан шотлалтеш (директоржо – Игорь Евтюхин).

Чынак, самырык тукым физически пеҥгыде, таза лийшаш. Сандене клубыш коштшо-влак спорт дене кылым кучат. Тыгодым кажнын тазалыкшым

шотышт налыт. Афган сареш геройла вуйым пыштыше землякна М.Евтюхиным шарныме лӱмеш бокс, дзюдо дене турнирлам эртарат.

Тений, 17-18 октябрьыште парашют спорт дене 6-шо ротым да Евтюхиным шарныме лўмешак всероссийский таҥасымаш лийын.

Йошкар-Олаште юж-десант войскан кечыжым палемдыме годым Российын Геройжо гвардий подполковник Марк Евтюхинлан бюстым шогалтеныт.

Йошкар-Оласе ветеран-влакын советше десантник-влак ушем вуйлатыше М.Фтакуллиным, Марий Элысе чыла десантникым шкешотан юбилей дене шокшын саламла да самырык тукымым военно-патриотический воспитатлымаште тазалыкым, творческий шўлышым тылана.

Е.ЭШКИНИНА

Опубликовать в Одноклассники

Добавить комментарий