Тений индеш тылзе жапыште Марий Элыште чодыра фондын кумыдыкыштыжо 49 гана тудым шолыштыныт.
38 случайын организаторжо-влакым рашемдыме. Вич еҥым уголовно, ныл еҥым административно мут кучаш шогалтыме. Шолып чодырам руымо кугыт 455,74 кубометрыш шуын, 2341 тӱжем теҥгеаш эҥгек ышталтын.
Законым пудыртышо-влак эҥгекым ыштыме кугытым шке кумылын 22,8 процентлан пӧртылтеныт.
Таҥастарашлан: кодшо ийын тыгай пагытлан чодырам шолыштмо 103 случай лийын. Тудын кугытшо 2 157,74 кумбометрыш шуын да ыштыме эҥгекым 12 миллион теҥгеш акленыт.
С.Носова
