Вес еҥын телефонжым верештынам гын, тидым шолыштмашлан шотлен кертыт мо?
А.Васильев.
Йодышлан Медведево районысо прокурорын кугурак полышкалышыже С. Г.Белова вашештен:
— Чынжымак, вес енын йомдарыме телефоным мумеке, тудын дене мом ышташ — йодыш лектеш. Юриспруденций велымат тидын шотышто кокытеланымаш уло: мумылан але шолыштмылан шотлыман. Эл кӧргӧ паша органлаш тидын дене кылдалтше йодмаш пелен тыгайрак сынан умлытарымаш лиеда: «Барыш пурымем годым мобильный телефон пеленем лийын. Шагал огыл подылынам, умбакыже мо лиймым сайын ом шарне. Эрденылан телефон уке лийын. Кушко тудо йомын — ом шарне: ала барыште монденам, ала корнышто йомдаренам, але вес еҥлан йыҥгырташ пуэнам»…
Тыгай случайым тергыме годым, видеонаблюденийлан, случайный свидетель-влаклан эҥерташ логалеш. Нунын ойлымышт почеш, йодмашым пуышо-влак эре гаяк йӱшӧ лийыт. Телефонжым ӱстембаке пыштен, кушташ каят але мӧҥгыш. Варажым вес еҥ-влак телефоныштым муыт да шкаланышт налыт…
Тыгай годым телефоным налшыжымат титаклаш амалже уке, вет тудым муын, лектеш. Туге гынат телефоным налшым тидым шонен ыштышылан, вес енын погыжым шкалан шолып шолыштмылан шотлыман. Вет тудо пален тидым ышта, телефонжо вес еҥын.
Эшежым мобильный телефонын идентификационный номерже уло, да тудо пашаче состоянийыште улеш, сандене кеч-могай обстоятельствыште озаже, шке номерышкыже йыҥгыртен, терген налын кертеш. Санденак телефоным мушын ошкылжым еҥ погым шолыштшо семын аклыман.
С.Носова.
