Марий Элыште всероссийский калык перепись дене «Шокшо линий» пашам ышташ тӱҥалын.
«Ростелеком Контакт-центр» компаний тидлан йӧным ыштен. Контакт-рӱдерын 170 операторжо ончыч перепись дене кылдалтше пашам шукташ лӱмын тунем лектыныт. Ынде нуно калык деч пурышо йодыш-шамычлан вашмутым пуат. Тыгай номер дене йыҥгырташ лиеш: 8-800-707-2020. Йыҥгырым 9 шагат эр гыч 21 шагат кас марте налыт.
Рӱдер ончылгоч пурен кертше йодыш-шамычлан вашешташ индеш тематический блок гыч шогышо базым ямдылен. А тиде – 200 наре йодыш-вашмут. Пеш неле йодыш лиеш гын, Росстатын специалистше-влак шке вашештат.
С.Носова
