КУЛЬТУР ДА ИСКУССТВО ОБРАЗОВАНИЙ

Школла ден колледжым иктеш ушат

Тӱвыра да сымыктыш аланыште пашам ыштыше специалист-влакым ямдылаш образовательный кластерым ыштат.

Рашынрак ойлаш гын, Национальный президент школ-интернат ден Национальный президент сымыктыш школым пужен уэмдыме да нуным И.Палантай лӱмеш культур да искусство колледж пелен ушат. Тидын нерген кодшо кечылаште Козьмодемьянскыште Марий Эл правительствын эртыше заседанийыштыже палемден республикын тӱвыра, савыктыш да калык паша шотышто министрже Константин Иванов.

— Таче кечылан кундемыштына специалист-влак огыт сите. Национальный президент сымыктыш школын выпускникше-влак Марий Эл деч ӧрдыжкӧ тунемаш каят, сандене ты шотышто у йӧным кычалаш логалеш, — палемден министр.

А тыгай йӧн дене Российын икмыняр регионыштыжо шукертсек пайдаланат улмаш. Сай пример шотеш министр ӱмаште 20 ияш лӱмгечыжым пайремлыше Марий Элысе профессиональный балет школын пашажым палемден. Кызыт Э.Сапаев лӱмеш опер да балет академический театрын балет труппыштыжо 98 процент артистшым верыште ямдылыме улыт.

Образований да науко министр Наталья Адамоваланат тыгай темлымаш келшен. Культур министрын шонымашыжым Марий Эл вуйлатыше Александр Ефстифееват сайлан шотлен да регионысо образований да науко министр дене пырля тидын дене кылдалтше йодышым каҥашаш темлен.

А.БАЙКОВА

Опубликовать в Одноклассники

Добавить комментарий