УВЕР ЙОГЫН

Шке кундемнам шке… амыртена

Россий президент В.Путинын калык дене вияш эфирыште мутланымыж годым еҥ-шамычлан мо дене гынат полшаш сӧрен. Илыме пӧртла воктенак шўкшакым кышкымым тудо шылтален, пўртўсым аралаш кўлмӧ нерген ойлен.

Тидыже мемнан республикыштат еҥ-шамыч илыме кундемыште арулыкым эскерымым тергымаште шўкалтышым ыштен. Лач нунын деч тергыше органлаш вуйшиймаш ешаралтын.

Такше кушто илена, тусо вер-шӧрым амырташ шот огыл. Но теве Морко районысо вич ялыште илыше-влак тидын нерген монденыт векат, тўрлӧ торым шке илемышт воктекак луктын оралат. Тидым прокуратур орган тергымыж годым ужын налын.

Морко ола шотан илем, Зеленогорск, Волаксола, Семисола, Кугу Шале илемла кундемыште лач ыгай шотдымылыкым верештыныт.

— Еҥ-влак бытовой, чоҥымо деч кодшо  шўкшакым, пластмасс, полимер, янда деч кодшым ялла деч торашкак огыл конден кышкат, — маныт прокуратурышто.- Верысе самоуправлений органлаште ыштыше пашаеҥ-влак тидым ужын огытыл мо? Туштыжо шўкшакым погымо да лўмын ойырымо верлаш чумырымо пашам йӧршеш огыт виктаре манаш лиеш. А бытовой куштырам погымо да утилизироватлыме пашалан лач верысе власть вуйын шогышаш ыле.

Кўшнӧ ончыктымо илемла кундемым вуйлатыше-влаклан ты экшыкым кораҥдаш кўштымӧ.

А.АНДРЕЕВ.

Опубликовать в Одноклассники

Добавить комментарий