КПРФ-ын республикысе отделенийже Марий Элын вуйлатышыжым сайлымаште шкенжын еҥжым кандидат семын огеш лук, а Александр Евстифеевын кандидатурыжым поддержатла.
Тыгай решенийым 22 июньышто эртыше конференцийыште луктыныт.
«Марий Ушем» мер организаций КПРФ деч кандидатлан Торъял кундем гыч Григорий Петров-Чоткарым лукташ темлен. Но вараже тудо самоотвод дене шке кандидатурыжым кораҥдыктен.
Верысе коммунист-влакын лидерышт Иван Казанков нунын да Александр Евстифеевын ончыкыжым республикым кузе вияҥдышаш, неле социально-экономический сӱрет гыч лукшаш шотышто шонымашна икгай, сандене ончыко пырля ошкылаш тӱҥалына манын палемден.
— Шке шонымашем ик гана веле огыл ойленам – мый республикым вияҥдышашлан, Марий Элыште илышым саемдышашлан чыла вийым ушышаш верч улам. Конференций деч ончыч КПРФ-ын лидерже Геннадий Зюганов дене мутланенам. Тунам шке мутем деч ом кораҥ да пайдам конден кертше кеч-могай вий дене пашам ышташ ямде улам манын каласенам, — ойлен конференцийыште журналист-влаклан Александр Евстифеев.
Л.Камалетдинова.
