Марий Элын Тазалыкым аралыме министерствыжын 19 октябрь эрдене увертарымыж почеш, пытартыш суткаште регионысо больницыла гыч паремше 15 пациентым мӧҥгӧ колтымо, тыгодымак 71 черлым эмлалташ пыштыме. Тыге, теҥгече эрдене республикысе индеш инфекционный стационарыште чылаже 931 еҥым у коронавирус инфекций деч эмлыме, ты чот гыч 180 пациент неле состоянийыште лийын, 11 черле шодым искусственно вентилироватлыме йӧн дене шӱлен, 431 еҥ – кислород полшымо дене.
«Коронавирус: статистика» сайтын 19 октябрьысе данныйже почеш, пытартыш суткаште Марий Элыште Covid-19 дене 52 еҥ инфицироватлалтын. Пандемий пагытыште у коронавирус инфекций дене чылаже 5522 граждан черланен, 4562 еҥ паремын, 59 черле колен.
М.ИВАНОВА
