КУЛЬТУР ДА ИСКУССТВО

«Ший памаш» муро кумылжым ылыжтен

Лаштыкнан тачысе унаже – Евгений ИВАНОВ. Тудо Волжский районысо Отымбал ялыште шочын-кушкын, а кызыт Озаҥ оласе авиаций заводышто пашам ышта. 

Евгений кодшо идалык мучаште Марий Эл радион эртарыме «Эр Чолпан» конкурсыштыжо «А тый муралте» мурыж дене сеҥышыш лектын.

Кунам тудо мураш кумылаҥын? Репертуарже кугу мо? Нине да моло нерген шкеж дене мутланышна.

Женя, мурылан изнекак шӱмаҥынат мо?

– Изи годым вожылшырак лийынам, но муро чоныштем эреак лийын, сандене семынем веле мурен коштынам. Мемнан ешыште ны мурышо, ны семӱзгар шоктышо лийын огыл. А мыйын гармоньым шокташ тунемаш кумыл уло, ты семӱзгарын йӱкшӧ моткоч келша.

Школ деч вара Палантай лӱмеш культур да сымыктыш колледжыш тунемаш каяш шонымашет лийын огыл?

– Уке. Тидым хобби семын шотленам. Школ деч вара Озаҥ оласе Туполев лӱмеш авиаций институтыш пуренам. Кумшо курсышто тунемме годым верысе культур пӧртыштӧ отчёт концертлан ямдылалтыныт. Клуб вуйлатыше Галя акай мыйымат тушко ӱжын да «Йӧратыме Отымбалем» мурым пуэн. Мурылан мутшо ден семжым Володя Матвеев возен.

– Тунамак икымше гана сценыш лектынат?

– Туге. Чонышто изишак тургыжланымаш лийын, но калыкын тауштен совым кырымыже кумылем нӧлтен да ончыкыжымат сценыш лекташ таратен. Тиддеч вара мылам тӱрлӧ мероприятийым вӱдаш ӱшаненыт, кушташат логалын. Тылеч вара жап ятыр эртен, но мураш шонымаш – эреак чоныштем.

Ӱмаште тый «Ший памаш» муро фестивальын участникше лийынат. Тушко  ушнаш кӧ темлен?

— Тыгай фестиваль эртаралтме нерген пален налмеке, вием, мастарлыкем терген ончашак шоненам да арам огыл, «За сценическое обояние» номинацийыште палемденыт. Фестивальыште фонограмме да семӱзгар деч посна калык мурым, тыгак «Шем шинчан таҥем», «А тый муралте» муро-влакым муренам. Кокымшыжо Володя Матвеевын репертуарже гыч лийын гын, кумшыжлан мутым Ирина Закиева возен, а семжым Вячеслав Осипов келыштарен.

– Фестивальым шкешотан уроклан шотлет?

– Чын. Фестиваль жапыште чапланыше композитор, мурызо-влакын мастер-классышт моткоч пайдалын эртен, шуко шинчымашым налынам. Тиддеч посна тӱрлӧ кундемыште илыше да эстраде аланыште вияҥше самырык мурызо-влак дене палыме лийынам, южышт дене кызытат кылым кучем. «Ший памаш» кумылем ылыжтен да ончыкыжымат репертуарем пойдараш шонем.

Тиддеч вара «А тый муралте» мурет Марий Эл радиошто йоҥгаш тӱҥале…

– Туге. Тунам «Эр Чолпан» проект лач кая ыле да мыят тушко ушненам. Сеҥышыш лекташ мурем колыштшо да йӱклышӧ-влак полшеныт. Сандене кажныжлан кугу таум ойлем.

Репертуарыштет мыняр мурет уло?

– Кумыт, кызытеш… Ончыкыжым профессионал-влак дене пашам ышташ да репертуарем пойдараш шонем. Мурын мутшо ден семже виян, келге содержаниян, чонеш логалше лийшаш улыт. Тунам гына муро калыклан келша да тудын ӱмыржӧ кужу лиеш.

А.БАЙКОВА

Опубликовать в Одноклассники

Добавить комментарий