Республикыште да тудын деч ӧрдыжсӧ туризм область шотышто Марий Эл Республик вуйлатышын грантшылан конкурс увертаралтын.
Молодежный политике, спорт да туризм министерствын палемдымыж почеш, тыгай грантым юридический лица (кугыжаныш (муниципальный) учреждений-влак огыт пуро), Марий Элыште регистрацийым эртыше да туризмым вияҥдаш полшышо посна предприниматель, казенный огыл некомерческий организаций, бюджет да автономный учреждений-влак налын кертыт. Но йодмашым пуымо жаплан нуно икмыняр условийым шуктышаш улыт. Тиде пагытыште РФ бюджет системын бюджетше да кугыжаныш внебюджетный фондла ончылно налог да моло платеж шотышто парымышт лийшаш огыл. Тыгак банкрот але предприятийым пытарыме, пужен ыштыме процедурым эртышаш огытыл. Соискательын погыжат арестоватлыме, пашадар шотыштат парымже лийшаш огыл.
Грант ныл номинацийыште ойыралтеш:
- Марий Элыште турист-влаклан ончыкташ тӱзатыме але уэмдыме объект. Грантын кугытшо — 150 тӱжем теҥге;
- Марий Элыште туризм сферыште событийный мероприятий. Грантын кугытшо — 300 тӱжем теҥге;
- Марий Элыште турист индустрийысе субьектын пашажым вияҥдымаш (турист-увер рӱдер, экскурсий бюро, туроператор, тоштер). Грантын кугытышо — 300 тӱжем теҥге;
- Марий Эл Республикысе туризм сферыште эн сай сувенир проект. 150 тӱжем теҥгеаш кок грант лиеш.
Тений грантлан чылаже 900 тӱжем теҥгем ойырат. Йодмашым 27 январь гыч 10 март марте тыгай адрес дене пуаш лиеш: 424001, Йошкар-Ола, Успенский урем, 38-ше №-ан порт, 311- ше кабинет. Тел. (8362) 23-28-74. Конкурс нерген сайрак Марий Эл Правительствын сайтыштыже пален налаш лиеш.
С.НОСОВА
