КУЛЬТУР ДА ИСКУССТВО

«Шернур сӱан» – эн чапле видеофильм

10-12 июньышто Йошкар-Олаште VIII видеофестиваль эртен.

Тушко Белгород, Кострома, Томск, Тверь, Челябинск, Нижегородский областьла, Пермь кундем, Татарстан, Бурятий, Коми, Удмуртий, Карелий да Марий Эл республикла гыч калык творчестве, тӱвыра, этнографий дене кылдалтше видеопаша-влак пуреныт.

Фестивальын финалышкыже 49 видеофильм лектын. Жюри нуным кок кече ончен. Сеҥыше-влакым куд номинацийыште палемденыт. Шернур районысо рӱдӧ клуб системын методистше Тамара Пакееван «Шернур сӱан» видеофильмже гран-прим сеҥен налын.

Тиде кином сниматлымаште районысо тӱвыра пашаеҥ-влак тыршеныт. Съёмкышто Койсола, Кучанур, Кукнур, Тамшэҥер тӱвыра пӧртын артистше-шамычат лийыныт. Видеооператорын пашажым Йошкар-Ола гыч Галина Сафонова ден Марий Турек гыч Иван Герасимов шуктеныт. Фильмлан сценарийым Надежда Пирогова ден Валентина Лучкова возеныт. А монтажым ышташ процессорым налаш спонсор полышым Валерий Попов пуэн.

Видеофильм «2013-2020 ийлан Марий Элын тӱвыраже» республикысе программе полшымо дене ышталтын. 

А.БАЙКОВА

С.Пехметован фотожо

Опубликовать в Одноклассники

Добавить комментарий