7 февральыште Йошкар-Оласе «Марий Эл» ий полатыште Анатолий Тарасов лӱмеш «Шӧртньӧ шайбе» всероссийский таҥасымашын зональный этапше иктешлалтын. Тудо кум кече шуйнен.
Турнирыште, ийготым шотыш налын, участник-шамыч кум тӱшкаште таҥасеныт. Икымше кечын 2008-2009 ийлаште шочшо-влак вийыштым тергеныт. Ты группышто чемпион лӱмым Волжск гыч «Каскад» команде налын. Кокымшо верыш Марий Турек гыч «Восток» команде лектын. Пьедесталын почётан кумшо верышкыже Красногорский посёлкысо «Мотор» командыже кӱзен.
Кокымшо кечын 12-13 ияш-влак ий ӱмбалне таҥасеныт. Ты тӱшкаште Йошкар-Ола гыч «Спартак», Волжск гыч «Каскад», Красногорский посёлко гыч «Мотор» команде-влак призёр радамыште лийыныт.
Кумшо кечын 14-15 ияш хоккеист-влак мастарлыкыштым ончыктеныт. Икымше верыш Йошкар-Ола гыч «Спартак», кокымшыш Марий Турек гыч «Восток», кумшо верыш Волжск гыч «Илеть» команде-влак лектыныт.
Саламлыме годым «Хоккей – спортын йӱлаш пурышо да моткоч кӱлешан видше. Тудо кеч-могай шонымашке шуаш полша», – палемден Марий Элын тӱҥ федеральный инспекторжо П.Журавлёв. Сеҥыше команде-влаклан хоккей ӱзгарым налаш 100 тӱжем теҥгеаш сертификатым кучыктен. Кокымшо верлан – 50 тӱжем теҥгем. Тылеч посна призёр радамыш логалше чыла командылан у хоккей тоям налаш сертификатым пуэныт.
Тыге сеҥыше команде-влак финалыште Марий Элын чапшым аралаш тӱҥалыт. Кажне тӱшкалан посна турнир эрта. Мутлан, изирак ийготан-влак 5-13 апрельыште Сочиште, вес тӱшка 14-22 апрельыште Смоленскыште, кугурак ийготан рвезе-шамыч 16-24 мартыште Пермь ден Краснокамскыште модыт.
Тыгай проект регионлаште йоча-юношеский хоккейым илышыш шыҥдарыме амал дене эртаралтеш.
Е.Эшкинина.
