20 сентябрьыште Пермьысе кугыжаныш национальный шымлыше университетыште кугу туткар лийын. Тиде кечын эрдене тушко самырык еҥ пурен да лӱйкалаш тӱҥалын. Азапыште 6 еҥ колен, ятыр еҥ сусырген.
Марий Эл вуйлатыше Александр Евстифеев Пермь крайын губернаторжылан да тушто илыше-влаклан тидын шотышто чаманымашыжым колтен. Тидын нерген Инстаграмыште «Александр Евстифеев. Марий Эл» аккаунтышто увертаралтеш.
Республик вуйлатыше палемден: ты шучко увер уло элым ӧрыктарен (потрясла). Туткарыште титакдыме самырык еҥ-влак коленыт да сусыргеныт. Тидыже Российлан пеш кугу эҥгек лийын. «Пермь, ме тендан дене пырля ойгырена. Колышо-влакын ешыштлан чаманымашым ойлена, а сусыргышо-влаклан писынрак тӧрланаш тыланена», – палемден Марий Эл вуйлатыше.
Александр Евстифеев ешарен: республикна Пермь крайлан кӱлеш полышым пуаш ямде.
* * *
Пермьыште лӱйкалымаште колышо-влакым шарныме лӱмеш Йошкар-Олаште, Ленин площадьыште, жаплан мемориалым почыныт (снимкыште).
Тидым республикысе университет-влак ыштеныт. Санденак тудым кок вуз коклашке вераҥденыт.
Мемориал деке еҥ-влак пеледышым пыштат да сортам чӱктат.
Туткарыш логалше да нунын лишыл еҥыштлан меат чаманымашнам ойлена.
Юмо аралыже тыгай деч…
Любовь Камалетдинова
М.Скобелевын фотожо