КАЛАСЕ, "МАРИЙ ЭЛ"

Шагалемдат да ешартышым пуртат

Мый 11-ше классыште тунемам. Колынам, лишыл жапыште вузыш тунемаш пураш йодмашым иканаше чыла вере пуаш огеш лий манын. Тиде тыгак мо?

А.ТОКТАРОВ.

Шернур район.

Йодышлан Марий Элын Образований да науко министерствын пресс-службыштыжо вашештеныт:

– Россий Просвещений министр О.Васильева абитуриент-влакын йодмашым иканаште вич вузыш пуэн кертмыштым сай семын огыл палемден да тиде чотым иземдаш темлен.  Таче кечын школым тунем пытарыше йодмашым вич вузыш, ик вузын кум направленийышкыже пуэн кертеш.

Тылеч посна Ольга Васильева ЕГЭ-м шке кумылын гына кучымо темлымашым пуртымым йӧршеш кӱлдымылан шотлен. Тудын мутшо почеш, школым тунем пытарышын могай шинчымашым налмыжым  лачак обязательный иктешлыше кугыжаныш экзамен тергаш полша. Чыла огыл вузышто тунемаш пурымо конкурс кугу, санденак Просвещений министр кӱшыл тунемме верлаште тӱҥ предметла дене ешартыш экзаменым пурташ темла.

Каласыман, кызыт руш йылме, математике предметла ден ЕГЭ обязательный радамыш пура. А теве 2022 ий гыч тунемше-влак историй да англичан йылме дене иктешлыше кугыжаныш экзаменым обязательный семын кучаш тӱҥалын кертыт.

Л.ШАБДАРОВА.

Опубликовать в Одноклассники

Добавить комментарий