Лилия Петухова, мурызо:
– Мӧҥгыштӧ шинчаш кӱлмӧ йодмашым ешем дене тӱрыс шукташ тыршена. Мый ялыште илена: шке пӧрт, шке кудывече, шке пакча… Тидыже пачерыште илыме деч чотак ойыртемалтеш, сандене самоизоляций манме жапым эртараш куштылгырак. Тудым пайдалын, оҥайын эртарена: тӱрлӧ кочкышым ямдылаш
тунемынам, йоча-влаклан йочасад гыч колтымо заданий-влакым кажне кечын дистанционно шуктена, тӱрлӧ онлайн йӧн дене визажист, вокал, мурымо годым чын шӱлымаш, йӱкым чын лукмаш курс-влакым эртем. Тиддеч посна репертуарым пойдарыме, муро-влак могай лийшаш улыт да моло нерген шонаш йӧн уло. Жап лекме семын почеламутымат возгалаш тӧчем, а иктажшылан семымат келыштараш шонем. Вашке кок у муро ямде лийшаш. Концерт дене калык мияш вуча, йодеш. Тиде жапым кӱлеш семын илен лектына гын, калык дене уэш вашлийына манын ӱшанем!
А.БАЙКОВА
