Йошкар-Олаште илыше 35 ияш ӱдырамашын кум тӱжем теҥгеаш йоча коляскыжым шолыштыныт. Тудо шочшыжым свежа южыш луктын. Ик кудывечыште йоча модаш тӱҥалын. Икшывым эскерышыжла, ӱдырамаш коляске деч торлен да тудын йоммыжым вара гына шекланен. А 45 ияш ӱдырамашын автомашинаже 3,7 тӱжем теҥгеаш аккумулятор деч посна кодын. Вор тудым путырак куштылгын шолыштын: машинаште сигнализаций лийын огыл, а ик омсам гын петырымат огыл улмаш.
Вор-влак ола деч ӧрдыжтӧ верланыше сад-пакча ден пӧртымат толат. Кодшо кечылаште Печать пӧртын ик вахтёржо сад-пакчаж гыч чыла вочкым нумалын наҥгайыме нерген чот тургыжланен каласкалыш. Умылем илалше еҥым: тыгай вес йоҥгытым налаш ынде шагал огыл оксам луктын пышташ логалеш.
Пластик картымат шолыштыт да тусо оксам тӱрлӧ йӧн дене луктыт. Тыгай азапыш рӱдолаште да Морко районышто илыше кум еҥ логалын…
Тул чыла наҥгая гын, вор иктаж-мом да кода, маныт. Но совла веле йомеш гынат, чонлан садак каньысырын чучеш. Сандене тӱткӧ лийза, погыдам кӱлынак эскерыза.
М.ИВАНОВА.
