УВЕР ЙОГЫН

«Чыла тукым пограничник-влаклан»

У Торъял районысо Овалже школ кумдыкышто эше ик шарныктыш ешаралтын – 25 майыште тыште Пограничник-влаклан меҥгым да шарнымаш знакым  почыныт.

Изирак кӱ мемориалыште кӱчыкын гына возен шындыме «Пограничникам всех поколений».

Тидлан пӧлеклалтше торжественный мероприятийыш ты кундем гыч веле огыл, тыгак пӱтынь район, эсогыл пошкудо кундем ден Йошкар-Ола гычат погранвойскаште службым эртыше-влак толыныт.

Митингыште Пограничник-влакын шушаш пайремышт да шарнымаш знакым почмо дене погынышо-влакым У Торъял район муниципал образований вуйлатыше Е.Небогатиков, Марий Элысе пограничник-влакын «Застава» мер организаций председательыштын алмаштышыже С.Белобородкин, Афганистанын ветеранже-влакын У Торъял районысо ушем председательже В.Мосолов, моло саламленыт. 

Шарныктышым шогалташ «Застава» мер организацийын Овалжысе  отделенийжым вуйлатыше, шке жапыштыже погранвойскаште служитлыше, а кызыт верысе школын туныктышыжо Александр Сидоркин темлен да тудак тӱҥ организатор лийын.

Мероприятийыш верысе школышто тунемше-влакат ушненыт. Нуно элын чекше, пограничник-влак, службо нерген почеламутым лудыныт.

Верысе школышто самырык пограничник-влакын отрядышт уло. Тиде мероприятийыштак кум ӱдыр присягым приниматленыт.

Погынышо-влак тӱрлӧ сарыште вуйыштым пыштыше-влакым порын шарналтеныт, нунын нерген шарналтен ойленыт.

Пытартышлан верысе школ кумдыкышто уло обелиск ден памятник-влак,  пырдыжышке вераҥдыме мемориал оҥа-влак деке пеледышым пыштеныт.

Л.Камалетдинова.

Фотом соцкыл гыч налме.

 

Опубликовать в Одноклассники

Добавить комментарий