Параньга районлан - 90 ий

«Чыла тоштемеш, чыла тӧрлыман»

Ты предприятият – отрасльым пужен ышташ тӱҥалмеке, ик кугу озанлыкын шелалтме саскаже. Но тудо тылеч ончыч шочшо да панкрутыш лекше вес предприятийым алмаштен да улыжат 2014 ийыште ышталтын. Да ту жап гычак «Жилком-Сервис» ООО-м Д.Г.САБИРЗЯНОВ вуйлата.

– Динар Гафифьянович, Те тиде отрасльыш кузе толында?

– Мый Параньга кыдалаш школ деч вара Москвасе потребкоопераций университетым тунем пытаренам. Ончыч потребкоопераций, вара «Газпром»  системылаште ыштенам. Илыме вер ден коммунал озанлыклан мутым кучышо вес предприятийын нелылыкыш логалмекыже, уым почаш да вуйлаташ мылам ӱшаненыт. А 2018 ийыште эше Марий Эл Кугыжаныш Погынын депутатшылан сайлалтынам. Тӱҥ пашамат, мер пашамат калык верч тыршымаш дене кылдалтыныт манын кертам. Вет мемнан организацийын тӱҥ задачыже – районысо шуко пачеран пӧртлаште илыше-влаклан йӧным ышташ. Нунылан тушто шокшо, волгыдо, йӧнан лийже, быт да технический нелылык дене шагалрак ваш тӱкнышт манын тыршаш. Ме тӱшкан илыме пӧртлам виктарымылан, обслуживатлымылан да шотыш кондымылан вуйын шогена.

– Пашаче ешда могай кумыл дене ышта?

– Коллективыштына 25 еҥ тырша. Чылан пашаштым профессионал семын палат. Кажныже шке кумдыкшылан да сомылжылан мутым куча. Шукынжо пенсийыш лишемше але пенсий ийготан улыт. Самырык-влак отрасльыш шагал толыт. Нуно утларакше олаш каяш тыршат, вет тушто шукырак тӱлыман пашам муаш лиеш. Сандене толшышт кодышт манын тыршена, туныктена.

Предприятийна чыла налогым жапыштыже тӱла. Пашадар шотыштат парымна уке. Тудыжо пеш кугужак огыл гынат, пашаеҥ-влак оксам тылзеш кок гана да жапыштыже налыт.

– Кажне шошым Илыме вер ден коммунал озанлык пашаеҥ-влакын кечыштым палемдеда. Тений тудо мо дене ойыртемалте?

– Тудым ончычсо семын ыжна пайремле, амалже чылалан раш. Но премийым пуаш йӧным муна. Южыштлан наградымат кучыктышна. Теве слесарь-сантехник Сергей Иванович Бирюков Марий Эл правительстве вуйлатышын тауштымашыж дене палемдалте. Тудо предприятийыште 10 ий утла тыршен ышта, сандене тыгай акым сулен, шонем. Адакше профессийна нерген кугунжак огыт ойло гынат, тудо кӱлешан, вет мемнан деч посна шуко пачеран пӧртыштӧ йӧнан лийын ок керт.

Пашаеҥна-влак тыгак Чоҥымо паша, архитектур да илыме вер ден коммунал озанлык министерствын, район муниципал образований ден администрацийын Почётан грамотыштым нальыч. Тидыже куандара: мемнан тыршымынам ужыт, аклат.

– Те вет район рӱдыштӧ веле огыл, а район мучко шуко пачеран пӧртлам обслуживатледа?

– Да, Параньга посёлко деч посна Усола, Элнет, Кугу Пумарий, Руш Лажмарий яллаште. Яллаштыже шуко пачеран пӧртлам жапше годым совхоз ден колхоз-влак чоҥыктеныт. Кызыт ме обслуживатлена. Нуным эреак эскерен шогыде ок лий: вӱд пуч, канализаций, электричестве, шокшым пуымо сеть – чыла тоштемеш, чыла тӧрлыман. Олтымо сезон сайын эртыже манын, шошо-кеҥеж-шыже мучко шотыш кондыман.

– Районышто пеҥгыде коммунал отходым кышкыме полигонланат вет мутым кучеда?

– Тиде пашам организацийна ышталтмекак кучыктен пуэныт, лицензийнат уло. Тӱҥалтыште отходым шкеак шупшыктенна, шкеак тоенна. А 2019 ий гыч у Федерал закон вийыш пурен, да шӱкшакым поген шупшыкташ, контейнер площадкылам обслуживатлаш республикыштына «Благоустройство» ООО ышталтын. Ме кызыт полигонышто тойымо пашам гына шуктена. Ты должностьышто ыштыме жапыште мый ик гана веле огыл ойленам: отходым тойымо паша ны районлан, ны мемнан организацийлан  нимогай парышым ок пу, но ме тидым огына ыште гын, лавыра ден куштыраш йомына. Сандене тиде паша социальный миссий гайрак. Кундемна ару гын, тидыже мемнан тыршымына деч посна ышталтын огыл. Ме район верч ыштенна, ыштена да умбакыжат ышташ тӱҥалына.

Юрий ИСАКОВ

Опубликовать в Одноклассники

Добавить комментарий