29 октябрьыште Александр Евстифеев региональный вияҥмаш шотышто правительственный комиссийын президиумжын заседанийыштыже участвоватлен. Заседаний видеоконференцсвязь режим почеш эртен, тудым Россий Правительстве председательын алмаштышыже Марат Хуснуллин вӱден. Тушто 2020 ийлан да 2021 ден 2022 ийласе плановый жаплан федеральный адресный инвестиционный программым шуктен толмо йодышлам каҥашыме.
Марий Элыште тений тиде программе почеш кызытсе жаплан келшыше Перинатальный рӱдерым чоҥаш тӱҥалме. Тидлан чылаже 1652 миллион теҥгем ойырымо. Тиде программе денак келшышын тений сентябрьыште 100 еҥлан Красностекловар психоневрологический интернатын илыме корпусшым чоҥен шуктымо. Тидлан 79,91 миллион теҥгем кучылтмо. 2020 ийыште тыгак федеральный кӱлешлыкан автомобиль корно-влакым тӱзаташ, тидын шотыштак Йошкар-Ола–Зеленодольск корным Силикатный посёлко тураште волгалтараш 5,17 миллион теҥге ойыралтын.
Тиде программе почеш тений Марий Элысе ял-влакым тӱзатыме шотышто 54 проект илышыш шыҥдаралтеш. Тений тыгак чылаже 8,2 км кужытан газ пучым шупшаш да Кужэҥер районысо Саламатнур ялыш, Курыкмарий районысо Макарсир, Кугилансола да Цигансола яллашке газым пурташ палемдыме. «Яндар вӱд» федеральный проект почеш Медведево районысо Пӱкшерме, Шойбулак, Аэропорт, Пӱнчерсола илемлаште вӱдым ситарен шогымо системе уэмдалтеш. Тиде объект шушаш ий 30 июньышто пашаш колталтшаш. Пашан чумыр акше – 67 миллион утла теҥге. Тиде мероприятий 5200 утла еҥлан сай качестван вӱдым централизованный йӧн дене ситарен шогаш йӧным пуа.
Марий Эл Республикым вуйлатышын организаций да
аналитике виктемжын уверже негызеш
П.ШАКИРОВ ямдылен
