САМЫРЫК ТУКЫМ

Чылажат – тыйын кидыштет

Тиде ӱдыр икымше ончалтыш гыч вожылшын коеш, изиш мутланымеке шижат: могай поро, ласка… Мутем  Татарстан кундемысе Балтаси район Улисъял ялын ӱдыржӧ Екатерина Изергина нерген.  Катя 11 класс деч вара шинчымашым Марий кугыжаныш университетыште поген. Кызыт Йошкар-Оласе «Смайлик» йочасадыште воспитательлан тырша. Тудын дене лишкырак палыме лийына.

– Катя, молан лач Марий кугыжаныш университетыш толынат?

– Улисъял – марий ял. Мый изи годсек марла мутланем, школышто тунемме годымат марий йылме да литератур дене олимпиадылаште шке вием тергенам.  Тыге Йошкар-Олаште республик кӱкшытан олимпиадыштат участвоватленам.  Лач тунам финно-угроведений институтын туныктышыжо-влак дене палыме лийынам.  Нунын кумылаҥден моштымыштлан кӧра,  марий йылме да литератур туныктышылан тунемаш толынам. 

– Финно-угроведений институтышто марий йылме деч посна могай йот йылмым тунемынат?

Тӱҥалтыште англичан йылмым, варажым венгр йылмым тунемаш йӧн пуалтын. Университетыште венгр йылмым Маргарита Нифонтовна Кузнецова туныктен. Тыгак Венгрийыште ик тылзаш кеҥеж курс эртаралтме нерген кураторна Элина Витальевна Гусева  каласкален. Тыгай курсыш ушнаш вигак келшышым. Тыгак тудо кӱлеш документ-влакым ямдылаш полшен.

– Тугеже тый эше Венгрийыште шинчымашым погенат?

– Туге. Тунемаш Дебрецен олашке логалынна. Тушто ныл арняш курс пеш оҥайын эртен. Кажне кечын венгр йылмым келгын тунемме. Кас кочкыш деч вара фольклор мероприятий эртаралтыныт. А каныш кечылаште экскурсий дене коштынна. Тиде кугу практике лийын. Вет вес калык коклаште шкем кучен мошташат, нунын дене венгрла мутланашат кӱлын.

– Кызыт венгр йылмым илышыштет кучылтат мо?

Йылмым мондаш огыл манын, шке семын посна книга да тетрадь почеш заниматлем. А туныктымо кружокым эртарымаш нерген шоналташ лиеш.

– Катя, тый вет Марий самырык тукым слётышто лийынат? Тудо могай шарнымашым коден?

–Тыгай слётыш  ӱмаште икымше гана миенам. Мый Татарстан гыч толшо делегацийыште лийынам. Мыланна Озаҥысе марий-влакын национально-культурный автономийыштым вуйлатыше Людмила Ивановна Мусихина  полшен шоген. Лӱмлӧ поэт да киноактёр Йыван Кырлан шочмо кундемыштыже – Шернур районысо Марисолаште – лияш кугу пиал. Слёт пеш писын эртен, шижынат шуктен омыл. Кажне кечын кӱлешан да пайдале занятий лийын. Каныш нергенат мондымо огыл. Кас еда тӱрлӧ мероприятий эртаралтын: марий кас, КВН, концерт, писатель ден  артист-влак дене вашлиймаш. Тыгак экскурсийышкат миен толаш жап ойыралтын: Александр Конаков лӱмеш тоштерыш, «Лукоз» каза фермыш, Йыван Кырлан чапкӱж деке. 
Слётыш миен толмеке, тыгай иктешлымашым ыштышым: самырык тукым шочмо калыкын йылмыже, йӱлаже, ончыкылыкшо верч тургыжлана.

Самырык-влак йочасадыште пашам ышташ пешыже кумылан огытыл. Пашадар изи, молан пашам ышташ йочасадыш каенат?

Изи йоча-влак дене пашам ышташ пеш оҥай. Нунын дене чон кана, икшыве-шамычын  тӱням ужмыштат весе, пуйто кечыйол коклаште коштат, да чонлан ласка лиеш. Шкендым уэш изи улметла шижат.

 Тиде чолга ӱдыр тыгай девиз дене ила: чылажат – тыйын кидыштет. «Тӱҥжӧ, нигунам вуйым сакыман огыл. Уэш да уэш тӧчен ончыман. Тыршет гын, садак кӱлеш лектышыш шуат».

 Е.Ёлкина

Опубликовать в Одноклассники

Добавить комментарий