РУБРИКИ

Чолгалык: Марий амазонко-влак

3 мартыште Медведево посёлко воктенсе ипподромышто «Марий амазонко-влак-2018» Марий Элын кубокшо верч таҥасымаш лийын. 

Ӱдырамаш пайрем деч ончыч Руэм посёлкысо ипподромышто эртыше таҥасымашке 50 утла участник ушнен. Ончышо-влаклан  нунын имне ӱмбалне ӱшанлын шинчен, мастарын кудалыштмыштым веле огыл ужаш, мотор, сай урлык имньымат эскераш пиал логалын.

Таҥасымашын рӱдыжлан ӱдыр-влакын 110 сантиметр кӱкшытым эртымышт шотлалтын. Имнешке-влак ты кечын «Марий амазонко» лӱмым налшаш верч тыршеныт.

Палемдыме корным эн моторын, чын да писын Арабика имньыж дене Дарья Егошина (имне спорт дене спорт школ) эртен. Тудо чыла чаракым йоҥылыш деч посна эртен да ший призёрым 8 секундлан ончылтен. Тыге Дарья «Марий амазонко-2018» почётан лӱм дене палемдалтын, кубок, медаль да дипломын озашт лийын, а имньыжлан сєрал попоным пуэныт.

Кокымшо верыш Анна Мошкина (Савино интернат) лектын гын, почётан кумшо верыш – Карина Афанасьева («Пригородный» КСК).

Участник-влак тыгак 80 сантиметр кӱкшытым эртымаште вий-куатыштым тергеныт, мастарлыкыштым ончыктеныт.

Тичмаш налмаште таҥасымаш сай кӱкшытыштє эртен. Организатор-влак ӱдырамаш-тренер-шамычлан шере пєлекым ямдыленыт. Тыгак сеҥыше-шамычлан окса пєлекым кучыктеныт, ӱдырамаш кече дене саламлен, тазалыкым, пиалым тыланеныт.

Е.Эшкинина.

Опубликовать в Одноклассники

Добавить комментарий