УВЕР ЙОГЫН

Чолгалыкшым ойыренак палемденыт

Кодшо кечылаште Москва областьыште, Сенеж ер воктене, «Территория смыслов» всероссийский форум эртен. Тушко Российысе 85 регион да 50 утла эл гыч самырык еҥ-влак чумыргеныт.

Ты гана форумын сменыже «Служение Отечеству» маналтын. Мероприятийыш силовой структурлаште тыршыше 18 гыч 35 ияш марте самырык еҥ-влак погыненыт. Нуно икте-весыштым шке опытышт дене палдареныт, командно-деловой модмашлашке, личностный вияҥмаш программылашке, мастер-класслашке ушненыт, уна-влак дене вашлийын мутланеныт.

Форумышко РФ обороно министр Сергей Шойгу миен. А сменын участникше-влакым Россий МЧС министрын икымше алмаштышыже Александр Чуприян саламлен.

Самырык-влак силовой ведомствын еҥже-влаклан шке йодышыштым пуэн кертыныт. Тыгай йӧн Марий Эл гыч мийыше Илья Глазыринынат лийын. Тудо «Панельный дискуссий» жапыште Сергей Шойгулан, Александр Чуприянлан, Российысе моло политический да общественный деятель-влаклан самырык-влакым патриотизм шӱлышеш куштымо да мер илыш нерген йодыш-влакым пуэн.

Вараже, «Уло тыгай профессий – шочмо элым аралаш» дискуссийым иктешлымеке, лачшымак Илья Глазыринын йодышыжым зал гыч пуымо эн сай йодышлан шотленыт да тудлан Михаил Хазин ден Сергей Щегловын «Лестница в небо» книгаштым кучыктеныт.

Форумышто чолгалыкым ончыктышо-влакым тыгак тушто лийше кумдан палыме публицист, политический консультант, телевӱдышӧ Анатолий Вассерман ойырен налын да кажныжлан шкенжын автографше дене книгажым пӧлеклен. Нунын коклаште адакат Марий Элысе МЧС-ын пашаеҥже Илья Глазырин лийын.

Тудо лачшымак могай йодышым пуэн улмаш, тыгак форумыш кузе логалмыж, могай шарнымашым кодымыж нерген, мо ӧрыктарен, келшен,  куандарен –  чыла тидын нерген шкеж дечак рашемдынена ыле. Тидлан, Россий МЧС-ын Марий Элысе Тӱҥ управленийышкыже йыҥгыртен, тудым кычал муаш шонышна. Но тушто каласышт: тудо, форум гыч пӧртылмекше, республикыште икмыняр кече веле лийын. Туге гынат чодыра пожарым йӧртымаштат тыршен шуктен. А вара вес мероприятийыш – Киров олаште эртаралтше таҥасымашыш – каен. Пеш чолга айдеме, коеш. Сандене тӱҥ управленийын пресс-службыштыжо нунын ямдылыме материалыштлан эҥерташ темлышт.

Мероприятий нерген Илья Глазырин тыгерак ойлен:

– Мутат уке, тиде форум нерген колынам да мо тиде тыгай улмо нерген изишак паленам. Но тудо тынар чот кӱлешан да оҥай лиеш манын шоналтенат кертын омыл. Политик, общественный деятель, силовой министерстве вуйлатыше-влак дене шинчаваш мутланаш, кӧм але марте телевизор дене веле ужынам ыле, нунылан шканыштак йодышым пуаш – тиде ончыкыжым пашаште кӱлеш лийше моткоч кугу опыт. Форумышто могай кугыт уверым пален налынам, тидын нерген мый эше кужу жап шонкалаш тӱҥалам, очыни.

Любовь Камалетдинова

Фотом интернет гыч налме

Опубликовать в Одноклассники

Добавить комментарий