ЭКОЛОГИЙ

Чодыра дене пырля «кушкыт»

Республикысе Йоча эколого-биологический рӱдерыште «Подрост» всероссийский юниорский чодыра конкурсын республикысе этапше эртен.

Тудым Марий Элын Пӱртус понялык, экологий да йырым-йырысе средам аралыме шотышто, Образований да науко министерствыже-влак эртараш полшеныт.

Тиде конкурс кажне ийын школ лесничествылаште тунемше ӱдыр-рвезе-влаклан эртаралтеш. Йӱла почеш тушто сеҥыше-влакым ныл номинацийыште палемдат, тыгак ик номинаций школ лесничестве вуйлатыш-шамычлан темлалтеш. Тений тушко 16 паша пурен. Организатор-влакын палемдымышт почеш, участник-влак кӱкшо шинчымашым ончыктеныт. Южо паша лектышым производственный пашаштат кучылташ темлыме.

Жюрин иктешлымыже почеш, «Чодыра паша» номинацийыште Дмитрий Садовин (Йошкар-Оласе 28-ше лицей), «Чодыра янлык-влакын экологийышт» номинацийыште  Аделия Нафикова (Волжск оласе Экологий рӱдер),  «Чодыра кушкыл-влакын экологийышт» номинацийыште Никита Вайшев (Шернур районысо Марисола школ),  «Пӱртӱсым аралыме практический паша» номинацийыште Валерия Шибанова (Юрино районысо Юркино школ) да Азат Мухаметзянов (Волжск оласе 6-шо №-ан школ) сеҥышыш лектыныт. Школ лесничествым эн сайын вуйлатыше семын Марисола школ гыч биологий дене туныктышо Валентина Бурда палемдалтын.  

 С.НОСОВА

Опубликовать в Одноклассники

Добавить комментарий