Эртыше арнян республикыштына ОРВИ дене черланыме 2338 случайым регистрироватлыме, тидыже эпидемий лондем деч 36,1 процентлан ӱлнырак да тылеч ончычсо арня деч 55,9 процентлан шукырак. Черланыше-влакын чумыр чотышт гыч 68 процентше (1591 случай) – 14 ияш марте йоча.
Грипп дене Йошкар-Олаште, У Торъял да Звенигово районлаште илыше кум еҥ черланен: А (H1N1/09) да В грипп кок кугыеҥым авалтен, А (H1N1/09) грипп дене – ик йоча. Палемдыме еҥ кокла гыч иктыжат грипп дечын прививкым ыштыктен огыл.
Эртыше арнянак У Торъял районысо ик школышто икымше классым карантиныш колтымо.
М.ИВАНОВА
