УВЕР ЙОГЫН

Черланыше огеш шагалем

Марий Элын Тазалыкым аралыме министерствыжын увертарымыж почеш, коронавирусын пандемийже тӱҥалме жап гыч 7 май йотке регионын шым инфекционный стационарже гыч COVID-19 дене черланыше да черланен кертыныт манын шонымо 367 еҥ паремын лектын.
Тыгодымак 255 еҥ умбакыже эмлалтеш. Ты чот гыч 212 пациент пневмоний дене орлана, 82 гражданлан «у коронавирус инфекций» диагнозым шындыме. 112 пациент неле состоянийыште, 134 еҥын тазалыкшым врач-влак «нелылыкын кокла йыжыҥже» семын аклат, индешыным – «нелылыкын куштылго йыжыҥже» семын. Ныл пациент шодым искусственно вентилироватлыме йӧн дене шӱла, 121 пациентлан кислород кӱлеш.
«Стопкоронавирус.рф» сайтын 7 майысе данныйже почеш, эртыше суткаште у коронавирус инфекций дене авалталтме эше 31 у случайым регистрироватлыме, да тиде чот ынде 814 еҥ марте шуын. Ныл черле колен.

М.ИВАНОВА

Опубликовать в Одноклассники

Добавить комментарий