УВЕР ЙОГЫН

Черланыше-влакын чотышт кугемеш

Марий Элын Тазалыкым аралыме министерствыжын увертарымыж почеш, 8 апрельлан регионыштына у коронавирус инфекций дене черланыме эше 27 случайым регистрироватлыме. Чыла еҥ тылеч ончыч черланыше-влак дене кылым кучен. Тыге, инфицироватлалтше-влакын чотышт республикыштына 40 марте кушкын.
Йошкар-Оласе больницын инфекционный отделенийыштыже 43 пациент эмлалтеш, тышечын шымытше – у короноавирус инфекциян. 23 еҥ неле состояницыште: 21 пациентлан кислород кӱлеш, коктын шодым искусственно вентилироватлыме йӧн дене шӱлат.
Республиканский йоча клинический больницыште ик йоча кия. Тудо у коронавирус дене авалталтын кертын манын шонат. Изи пациент шкенжым сайын шижеш. Кок йочан коронавирус дене черланен кертмыштым пеҥгыдемдыме огыл, нуным стационар гыч луктыныт.
Звенигово районысо рӱдӧ больницыште COVID-2019 вирус дене черланен кертше ик пациент эмлалтеш. Тудынат тазалыкше сай.
Роспотребнадзорын Марий Элысе виктемжын палдарымыж гыч, Гигиене да эпидемиологий рӱдерын да СПИД-рӱдерын лабораторийлаштышт чылаже 5947 шымлымашым эртарыме.
Таче кечылан 1122 гражданым, ты шотыштак у коронавирус инфекций дене авалталтын кертше-влак дене кылым кучышо 847 еҥым, медицине велым эскерат. Нунын коклаште 6 йот граждан улыт. Учёт гыч чылаже 1553 еҥым, ты шотыштак 47 йот гражданым, кораҥдыме.
Виктем вирусын авалтыме кумдыкшым, тыгак черле-шамыч дене кылым кучышо-влакым умбакыже рашемда, карантин шотышто темлымашым пуа, противоэпидемический мероприятий-влакым эртара, ты шотыштак черланыше да тудын дене кылым кучышо-влакын посна улмо режимыште лийшашышт да нунын коштмо вер-влакым дезинфицироватлыме шотышто пунчалым луктеш.

М.ИВАНОВА

Опубликовать в Одноклассники

Добавить комментарий