Коронавирус дене авалталтын кертмым ынде смартфон полшымо денат рашемдаш лиеш.
Пандемий пагытыште палынак шуко паша логалмым шотыш налде, Санкт-Петербургын вӱдышӧ врачше-влак Россий Федерацийын Тазалыкым аралыме министерствыж дене пырля смартфонлан у коронавирус инфекций дене кучедалме ваштареш виктаралтше приложенийым ямдыленыт. Тудын цельже COVID-2019 дене черланыме деч профилактикым эртарыме да калыкым у чер деч аралалтме йӧн дене палдарыме дене кылдалтын.
«Здоровье.ру» платформышто ыштыме программе полшымо дене пайдаланыше-шамыч коронавирус дене черланен кертмылан тестированийым эртен, инфекций дене авалталтын сеҥыме лӱдыкшым аклен, медицине полыш шотышто персональный темлымашым налын, тыгак врачын приёмышкыжо возалтын але тудым мӧҥгышкӧ ӱжыктен кертыт. Тестым эртыме деч вара Тазалык дневник почылтеш, тушто тургыжланаш таратыше тӱрлӧ ситыдымаш палдырныме годым мом ышташ кӱлмӧ нерген ойлалтеш.
Врач-шамычын командышт тыгак шинчымашым налме шым кечаш курсым ыштен. Тушто коронавирус дене кылдалтше профилактикын мерыже-влак да эн кумдан шарлыше шоя нерген пален налаш, дистанционный пашам организоватлыме, тыгак илыме верым эрыктыме шотышто темлымашым муаш лиеш.
Тылеч посна приложенийыште Н.П.Бехтерева лӱмеш Айдемын вуйдорыкшо институтын врач-психотерапевтшын ямдылыме тургыжланымым луштарыме упражненийже-влак улыт.
Приложенийлан оксам тӱлыман огыл. Тудым https://zdorovieru.onelink.me/F70S/3c36d4ac ссылке дене але App Store да Google Play Market программылаште «Здоровье.ру» йодмашым ыштен муаш лиеш.
Марий Элым вуйлатышын организаций да
аналитике виктемжын уверже негызеш М.ИВАНОВА ямдылен
