Общероссийский калык фронтын Марий Элысе региональный отделенийже «Спортын легендыже-влак – йоча-шамычлан» проект кышкарыште элнан чыла регионыштыжо «Чемпион дене зарядке» акцийым илышыш шыҥдара. Тушто школьник, студент, сузлаште тунемше, лӱмлӧ спортсмен-влак участвоватлат.
Марий Элыште ты акцийыш Йошкр-Оласе технологический колледжын студентше-влак ушненыт. Таче 10 шагатлан ты тӧнежыште тӱшкан зарядкым ыштат. Тудым фитнес-инструктор Анна Разумова ден сокыр-влак коклаште мини-футбол дене Европын чемпионжо Кирилл Печенин эртарат.
Акций самырык тукымым физкультур ден спортлан кумылаҥдыме,
тудым тукым гыч тукымыш кусарыме, спортивно-патриотический шӱлышеш воспитатлыме амал дене эрта.
– Акций самырык-влаклан таза илыш-йӱлан, спорт дене таҥлалтмын кӱлешлыкше нерген эше ик гана шарныктен. А спортышто сай кӱкшытыш шушо, чапле результатым ончыктышо-шамыч ӱдыр-рвезе-влаклан пример семын лийыт, – пеҥгыдемден Общероссийский калык фронтын Марий Элысе региональный отделенийжын сопредседательже Н.Богомолова.
Тений кеҥежым йоча-тазаҥдыме «Шап» лагерьыште тыгаяк сынан «Шӱдыр дене ГТО» мероприятийым эртареныт. Тунам йоча-влак футбол да пионербол дене таҥасымашке ушненыт. Пайремын унаже футбол дене СССР-ын спорт мастерже, РФ физический культурын да спортын заслуженный пашаеҥже, Марий Элыште олимпийский советын президентше В.Чумаков лийын.
Е.Эшкинина.