Марий сандалык эше ик виян эргыжым йомдарыш… Татарстан Республик Агрыз район Буймо кундемын данле шочшыжын, верысе ял шотан илемым вуйлатыше Владимир Васильевич Шамеевын, 8 ноябрьыште шӱмжӧ кырымым чарныш.
Шочмо вершӧржым, калыкшым, уло марий тӱням йӧратыше да тӱзаташ тыршыше йолташна 5 сентябрьыште 60 ийым темен ыле. Тудо 20 ий утла Буймо кундемыште администраций вуйлатышылан ыштен. Пелашыже Клара Геннадьевна дене кум эргым йӧратен, вӱчкен куштеныт. Владимир Васильевичын пеҥгыде шомакше пашаш таратен, поро мутшо кумылым налын, волгыдо да ару чонжо чын верч шогаш ӱжын. Буймо кундем ден Марий Эл кокласе корным журналист, артист, эстраде мурызо-влаклан В.Шамеев такырташ полшен.
Владимир Васильевичын ош тӱня гыч кайымыжлан чотак ойганена да пелашыже, кум икшывыже, уло родо-тукымжо да Буймо калыклан кугу чаманымашым каласена.
Марий Мер Каҥаш, «Марий Эл» газет редакцийын, М.Шкетан лӱмеш Марий национальный драме театрын, Марий самырык театрын коллективышт да Марий кундемысе лишыл йолташыже-влак.
