Мурышо да семӱзгарым шоктышо «Шуматкече» ансамбль эртыше курымын 90-ше ийлаштыже чумыргымекыжак калыкын ик эн йӧратыме коллективышкыже савырнен. Тудын мурыжо-влакым самырык-влакат, илалше-шамычат йӧратен колыштыт, мурат. Икмыняр жап ончыч «Шуматкечыш» самырык рвезе Руслан Никифоров ушнен. Тудат ансамбльын моло участникше-влак семын тӱрлӧ семӱзгарым шокташ мастар да солист семын шкетынат мура.
Руслан Морко районысо Ердӱр ял гыч.
«Шуматкече» ансамбльыш кузе тудо логалын? Мурым, семым возаш мо тарата? Тиде да моло йодыш-влаклан Р.Никифоров шкеже вашештыш.
— Руслан, школым тунем лекмеке, тунемаш кайыме йодыш тыйым тургыжландарен ыле мо?
— Кушко тунемаш кайыме шотышто кужун шонкаленам. Верысе школым 2011 ийыште тунем пытарымеке, Палантай лӱмеш тӱвыра да сымыктыш колледжыш пуренам. Тылзе наре калык семӱзгар пӧлкаште шинчымашым налынам, но балалайке дене шокташ келшен огыл, сандене колледжым коден кайышым. Варажым Эҥерсола тӱвыра пӧртыштӧ культорганизаторлан ышташ тӱҥалынам. Туштат шукак ыштен шым шукто: армийыш кайышым.
— Мураш изиэ годымат йӧратенат мо?
— Мемнан ял гыч кугорно марте корно кок километрыш шуйна. Йолташем дене ошкылмына годым эреак мурым шергылтаренна. Мурылан изинекак кумылан кушкынам, но сценыш лекташ ала вожылынам ала лӱдынам? Школышто иктаж концертыште мураш ынышт шогалте манын, шылын куржталынам.
— Но содыки кызыт сценыште мурет. Вожылмо, лӱдмӧ койыш деч кораҥаш мо полшен?
— Ик ият пеле ончыч, «Шуматкече» ансамбльыш толмеке, сценыш лекташ тӱҥалынам. Армий деч вара чонемым поэзий шӱлыш авалтен манаш лиеш. А жап эртымеке, сылнымут корнылашке сылне сем шкежак возеш. Тыге икте почеш вес муро-влак шочаш тӱҥальыч. Нуным возаш мӧҥгыштӧ аппаратур чыла уло. Муро-влакым йолташем дене возышна да интернетыш вераҥдышна. Тиддеч вара эше кум муро «шочо». Тидым ужмеке, мыйым Коркатово клубыш ӱжыктеныт. Тунам лачак «Шыже бал» лийшаш ыле. Тушто Игорь Борисов, Алексей Алексеев муреныт да мыламат коллективыш ушнаш темленыт. Виешак манме гай «Шыже бал» годым икымше гана сценыш луктыныт. Чот вожылынам ыле, но эркын-эркын ындыжым мондалтеш ала-мо…
Кумданрак — «Марий Эл» газетын
2018 ий 18 майыште лекше номерыштыже лудын кертыда.
Алевтина Байкова.
