Май тӱҥалтыште Нижегородский областьыште Йошкар-Оласе «УОР-СШОР» ден «Дзержинск-ТС» футбол команде-влак вашлийыныт. МФС кубок верч модмаште Марий Эл гыч футболист-шамычын тиде матч дебют семын лийын. «УОР-СШОР» оза-влаклан 0:3 счёт дене модын колтен.
Ӧрдыж кундемыште ты гана Марий Эл чемпионатыште да ЦСП Марий Эл командыште модшо-влак (Кожевников, Васильев, Пронин, Яковлев, Кислицин, Васильков, Садовин, Ушаков, Ганичев, Шабдаров, Погадаев) таҥасеныт. Тыгак Шуба, Черепанов, Сперанский вашталташ лектыныт.
Черетан вес вашлиймаш 16 майыште Йошкар-Олаште лиеш. Оза-влак «Чувашия» футбол клуб дене вашлийыт.
Такшым йӱла почеш Марий Элыште футбол тургымым республикын суперкубокшо верч модмаш гыч тӱҥалыт. Тиде кубок верч кок команде вашлиеш: чемпион ден эртыше тургымын кубок озаже. Тений «Волжск» ден «Тарханово» футбол клуб-влак вашлийыныт. Модмаш оҥайын эртен. Торжалыкат шижалтын, пӱжвӱдат йоген. Кок командыжат нападатлаш тыршен. Иктешлымаш: «Тарханово» команде 2:1 счёт дене ончыко лектын.
Е.Эшкинина.
