Кодшо рушарнян, 16 сентябрьыште, У Торъял районышто кол кучышо-влакын открытый таҥасымашышт эртыш. Тенийлан – кумшо гана.
Кумылан-влак Элеволко (Алеево) ял воктенысе пӱя деке 8 шагат эрденак чумыргеныт да кӧ спиннинг, кӧ чичкан эҥыр дене колым кучаш тӱҥалыныт. Кол кучымаште пиалан улмыжым тергаш ты кечын 17 еҥ погынен. А нунын коклаштыже тӱрлӧ ийготан рвезе ден пӧръеҥ веле огыл, ӱдыр ден ӱдырамаш-шамычат койыч. Но тӱҥ шотыштыжо районысо «Рыболов» клубын участникше-влак лийыныт.
Мероприятий тӱҥалтышланак миен шуам гын, мыят таҥасымашыш ушнем да, колжо логалеш ала уке, эҥырвоштыржым кучен шинчамак ыле! Но тӱрлӧ амаллан кӧра тӱҥ ужашышкыже – иктешлымашым ыштымашке – веле миен шуым. Сандене, чаманаш логалеш, шонымашем шукталтде кодо…
Сеҥыше-влакым жюри икмыняр номинацийыште палемдыш. Спиннингист-влак коклаште эн кугу нелытан, тыгак эн кугу колым Борис Шабалин кучен.
Чичка эҥыр дене кучышо-шамыч коклаште Анатолий Смирнов эн кугу нелытан да эн шуко колым кучымыж дене икымше верыш лекте.
Таҥасымаш тӱҥалмеке, эн ончыч колым пӧръеҥ огыл, а ӱдырамаш, Татьяна Пирогова кучен. Тидланак тудым палемдышт.
Таҥасымашын эн самырык участницыже семын Юлия Ергановам саламлышт. Тудо 5 ияш веле гынат, кочаж дене пырля ушнен. Тудо кок колым кучен кертын!
Эн опытан да эн кугу ийготан участник семын да чичкан эҥыр дене кучышо-шамыч коклаште кокымшо верыш лекмыжлан 80 ийым эртыше Юрий Петрович Заворотныйым палемдышт. Тудо, шке ойлымыж почеш, колым кучаш изиж годымак шӱмаҥын. А 40 ий наре эреак коштеш. Адакшым алят пашам ышта: Юрий Петрович – У Торъял эмлымверын терапевтше!
Рушарнян шочмо кечыжым палемдыше колызо Юрий Медведевымат пӧлек деч посна ышт кодо. Ойыртемалтше-влаклан кажныжлан медальым, пӧлекым да Чап грамотым кучыктышт.
Таҥасымашым «Рыболов» клуб вуйлатышын алмаштышыже, «У Торъял муниципал район» муниципал образований вуйлатыше Евгений Небогатиков ден Тошто Торъял ял шотан илем администраций вуйлатыше Николай Широбоков официальнын почыныт, сандене нунак мучашлышт. Коктынат танасымашыш ушнышо-влаклан тауштышт, сеҥыше-влакым эше ик гана мокталтышт да лишыл жапыште, иктаж каныш кечын чумырген, пӱя серым эрыкташ лекшаш нерген ойлышт. Евгений Викторовичын ойлымыж почеш, кажне таҥасымашыш чумыргымекат, таҥасымаш мучашлалтмекат кумдыкым шотыш кондат. Теве могай молодец улыт! Клубын участникше-влак эше шымлымаш пашам эртарат. Нуно районыштышт мыняр эҥер, пӱя, молан лачшымак тыге маналтыт, лӱмышт кушеч да кузе шочмым, кажныштыже могай кол улмым рашемденыт да посна картым ямдыленыт. Тушко чыла тиде данныйым пуртеныт.
Иктешлымаш деч вара чыланат подеш шолтымо кол шӱрым, пучан самбарыште шолтымо чайым пырля кочкыч, йӱыч. А шӱржӧ путырак ойыртемалтше ыле. Мо илем, тыгайым эше кочкын омыл. Тудо «Архиерейский» маналтеш, да шӱрыш кол дене пырля эше… чыве шылым пыштыме ыле! Санденак шкешт мыскара йӧре тудым «Уха из петуха» маньыч да мыйымат шунен-шуненак пукшышт. А «Рыболов» клуб вуйлатыше Лев Александрович Бирюков — моткочак поро кумылан, мутланаш йӧратыше, проста койыш-шоктышан да мыскараче шӱлышан айдеме – «теат шолтен ончыза» манын, рецептшым кугу кумыл дене пуыш. Тыгак – клуб нерген шке ямдылыме книгажым. Тиде эше сигнальный манме экземпляр веле ыле гынат, пӧлеклыш.
Пӱртӱсыштӧ тӱрлӧ семын канаш лиеш. Иктыштын, кайымекышт, почешышт южгунам эсогыл кугу кумдык чодыра йӱла. А весышт, мутлан, нине колызо-влак, вер-шӧрын арулыкшо верч азапланат. Санденак мыят каныш кечемын ик кӱчык татшым нунын дене пырля веселан, тазалыклан пайдалын эртарымемлан моткочак куаненам.
Любовь Камалетдинова.
