КУЛЬТУР ДА ИСКУССТВО

«У семын ончалаш, вес могырым аклаш тарата»

Воктенет — самырык еҥ

«У семын ончалаш, вес могырым аклаш тарата»

Тачысе лаштыкнан унаже — Пермь кундемын чолга эргыже Александр НИКОЛИН. Ме тудын дене ӱмаште эртыше Марий самырык тукым слётышто палыме лийынна.

— Мый шкеже Суксун район Кызганде ялыште шочынам, кызыт Пермь олаште илем.

— Тый слётышто шкендым чолган ончыктенат. Тышке толаш кӧ кумылаҥден?

Марий самырык тукым слётышто икымше гана лийынам. Марий ӱдыр-рвезе-влакым чумырышо ты мероприятий нерген ик гана веле огыл колынам, тышке иктаж гана логалам манын ӱшаненам. А пытартыш слётыш толаш мыйым Пермь оласе национально-культурный рӱдерым вуйлатыше Раиса Шамратовна Попова кумылаҥден. Тыгак слётын чолга еҥже, тушко ик гана веле огыл мийыше Айгуль Каландарован ойлымыжат мылам  кужу корныш тарванаш амалым пуэн.

—  Вузышто тунемат, илышет технике специальность дене кылденат. Тиде мер илышыште полша але мӧнгешла чаракым ышта?

— Мый Пермьысе политехнический университетыште нефтьым да газым перерабатыватлыше факультетыште тунемам. Уке, техник улам гынат, мылам тиде мер илышыш ушнаш нимынярат ок мешае, мӧҥгешла у семын ончалаш, вес могырым аклаш тарата.

— Марий калыкын илыме икмыняр кундемыштыже лийынат, сандене калыкнан, поснак самырык-влакын,  тушто да тыште могай улмыштым таҥастараш йӧнет уло…

Марий Элыш икмыняр гана толаш пиал шыргыжалын, сандене шкенан кундемысе ден тысе самырык-влакым таҥастаран кертам. Тендан дене марий ӱдыр-рвезе-шамыч ик верыште огыт шинче, эре ала-мом уым кычалыт, «шолыт», мемнан дене, очыни, илыш пӧрдмым тынаржак от шиж.

— Пермьыште илет гынат, шочмо йылмет дене сайын мутланет…

Шочмо йылмем мондаш авам пуэн огыл. Тудо мый денем эре марла кутырен. Тыгак слётышто лиймат марий йылмем утларак лывырташ полшен. Мый тушто палыме лийме йолташем-влак дене кызытат кылым кучем. Тыгак проектымат тушто возаш тунемынам. Тидыже илышыштем кугу шӱкалтышым ыштен, у кӱкшытыш нӧлталалташ амалым ыштен. Ӱшанем, теният Марий самырык тукым слётыш толаш йӧн лиеш.

— Капкылет гыч коеш, спорт дене пеҥгыде кылым кучет…

Мый боевой самбо дене заниматлем. Ӱмаште травмым налынам ыле, сандене пел ий эмлалтынам. Ты спорт мылам моткоч келша. Южгунам волышо кумыланлият, но тренировко деч вара вигак веселаҥат, шулдыраҥмым шижат.

— Илышетым ойырымо специальность денак кылдынет?

Ончылгоч каласен ом керт. Вузым тунем пытарем, вара армийыш каем. Тиде шонымашке шкак шуынам, молан манаш гын родо-тукым коклаште шукын военный улыт. Ик жап военный лияш шоненам, но тазалыклан кӧра тиде шонымаш деч шӧрлаш логалын.

Лидия ШАБДАРОВА мутланен.

Д.Речкинын фотожо.

Опубликовать в Одноклассники

Добавить комментарий