14-17 ноябрьыште М.Шкетан лӱмеш Марий национальный драме театрыште национальный драматургий фестиваль эртаралтеш. Тушко кӧмыт толыт? Фестиваль жапыште мом ышташ тӱҥалыт? Нине да моло нерген кодшо кечылаште театрын художественный вуйлатышыже Василий Пектеев дене мутланышна.
— Могай амал дене фестиваль эртаралтеш?
— Тудо театрын 100 ияш лӱмгечыжлан пӧлеклалтеш. Театрын ончыкылыкшо, марий драматургий, у пьесе-влакым кычалмаш — нине йодыш-влак мемнам поснак тургыжландарат. Шке жапыштыже театр тале писательна-влак Константин Коршунов, Миклай Рыбаков, Николай Арбан… дене кылым кучен. Нуно мемнан кокла гыч каеныт, а самырык возкалыше-влак йол ӱмбаке пеҥгыдын шогалын огыт керт. Тиде йодыш кызыт эн пӱсылан шотлалтеш. Сандене национальный драматургий фестивальым эртарашат тидак шӱкалтышым ыштен.
— Мероприятийыш кӧмыт толыт?
— Моско, Уфа олала гыч театровед-влакым ӱжынна. Арня жапыште ме ойырен налме ныл пьесым лончылаш тӱҥалына. Автор да ончыкылык режиссёр-влак дене пьесыште ситыдымашым, ончыкыжым кузе тудо вияҥ кертеш да моло нерген мутланена. А вара тиде пьесе негызеш республикыште улшо ныл самырык режиссёр (нунын дене кутырен келшенна) репетицийым эртарышаш да арня жапыште ыштыме пашаштым комиссийлан ончыктышаш улыт.
— Фестиваль деч могай лектышым вучеда?
— Артист-влак дене пашам ыштымеке, пьесын ончыкылыкшо могай, тудын почеш могай спектакль лектеш — мыланна раш кояш тӱҥалеш. Тидым ме шонен луктын огынал, тыгай семинар-лабораторий-влак Россий мучко шуко эртаралтыт. А Америкыште гын – 60-шо ийла гычак. Тиде йӧным кучылтын, театрнан ончыкылыкшо нерген йолгорным изишак такырташ шонена. Тиде фестивальна пайдалын эрта гын, тыгай семинар-лабораторийым чӱчкыдынрак эртараш тӱҥалына.
— Кӧн да могай пьесым лончылаш тӱҥалыда?
— Геннадий Гордеевын «Эр кече пиалым сӧра», Дина Кораблёван «Йӧратымаш сем», Чебоксар гыч самырык драматургын «Мыйын чоныштем — Пихамбар» да Светлана Вассанован «Эх пашкуды, пашкуды» пьесе-влакым лончылена.
— Арня жапыште тора кундемла гычат толшо театр коллектив-влакын пашаштымат ончаш йӧн лиеш?
— Чын. Фестиваль жапыште Калмыкий гыч театр «Я будда», Чуваш кугыжаныш академический драме театр «Мыйын чоныштем – Пихамбар», Озаҥ ола гыч Камал кугыжаныш драме театр «Пришлый» спектакльыштым ончаш темлат. Тиддеч посна Марий самырык театрын «Марпа. Рошто паран», Курыкмарий театрын «Кыткы сӱӓн» постановкыштым ужын кертына. А фестивальым шкенан спектакль дене почына. «Йыван Кырла. Путёвка в жизнь» лӱман спектакльым сценыш самырык режиссёр Степан Пектеев луктеш.
— Фестиваль эртымеке, театр арням эртареда. Тудо могайрак лиеш?
— Тыгодым шкенан репертуарыште пеҥгыдын «шогышо» спектакль-влакым кажне кечын ончыкташ тӱҥалына: «Ачийжат-авийжат…», «Салика», «Элнет», «Оръеҥ мелна», «Эргымлан кузык», «Илена-йӱлена». А 29 ноябрьыште Шкетан театрлан 100 ий темме лӱмеш пайремым эртарена. Вес кечынже театр коллектив шке йолташыже-влаклан кугу пайрем концертым ончыкта. Сандене чыландамат пагален ӱжына!
А.БАЙКОВА.
Фотом театрын архивше гыч налме
