Марий Элын Молодёжный политике, спорт да туризм министерствыже спортын икмыняр федерацийже дене «Спорт-вакцина» проектым ямдылен. Тудо республикысе спорт школлаште ямдылалтше-влаклан посна программе почеш тренировкым, занятийым эрташ полша.
Коронавирус шарлен кертме лӱдыкшым шотыш налын, но тыгодым спортсмен-влак физический формым арален кодышт манын, тренер-шамыч соцсетьлашке видеоролик ден моло материалым колтат.
Эртыше кечылаште палемденна ыле, коронавирус пандемийлан кӧра регионышто ныл бассейн жаплан петырналтын. Кызыт ВКонтактеште Марий Элын оперативный штабшын официальный сайтше пашам ышта. Тушто верысе калык пандемий да тудын деч кузе аралалтме нерген кӱлешан да пайдале уверым муын кертеш.
Илалше да шкет илыше кугыеҥ-влаклан кочкыш-сатум, эмым налаш, мӧгҥӧ гыч куштырам луктын шуаш волонтёр-влак полшаш тӱҥалыт.
Тидын шотышто шокшо линийыш тыгай телефон дене йыҥгырташ лиеш: 8 (8362) 63-00-39.
Жаплан чарат
Молодёжный политике, спорт да туризм министерстве, тыгак Роспотребнадзорын темлымышт почеш, кундемыштына фитнес-рӱдерлам, тренажёр залым, бассейнлам жаплан петыреныт. Коронавирус инфекцийын шарлен кертме лӱдыкшылан кӧра частный спорт учрежденийлашке, организацийлашке тидын нерген увертарыман серышым колтеныт манын министр Л.Батюкова. Тудын палемдымыж почеш, серыш темлымаш сынан.
– Республикыште 27 март гыч чыла фитнес-клуб ден спорт сооружений жаплан петыралтыт. Мыйын шонымаште, вуйлатыше-влак тиде йодыш шотышто ответственныйрак лийыт, вет мыланна кызыт калыкын (спортсмен, спортым йӧратыше, таза илыш-йӱлам кучышо-шамычын) тазалыкше эн шерге. Аралыза шкендам, – пеҥгыдемден Лидия Александровна.
Спорт министерствыште мероприятий ден эртышаш таҥасымаш, тыгак 2020 ийыште календарь план почеш палемдыме тӱшка физкультурно-спорт мероприятий-влакым вес жапыш кусарыме.
– Кеҥеж спортсмен-шамычлан изиш куштылгырак пагытлан шотлалтеш: таҥасымаш-влак шагалрак эртаралтыт. Сандене ты аланыште тыршыше, спорт мероприятийлам эртарыше организатор-влакым отпускыш колтена, – палемдыш Л.Батюкова. – Спортсмен-шамычлан ӧрдыж кундемлаш лекташат чарыме. Лӱдыкшыдымылык шотышто тыгай мерын контрольный жапше семын кызытеш 15 апрель шотлалтеш.
Е.ЭШКИНИНА.
