Параньга посёлкышто хирурглан ик гана чийышашлык халатым ургышо предприятийым торжественно почыныт.
Тиде у производствым «Здравмедтех» медицине изделийым ыштыше ассоциаций полшымо дене пашаш колтеныт. Тудын предприятийже-влак Москваште, Екатеринбургышто, Новосибирскыште, Озаҥыште улыт. Тидын нергн Параньга районысо «Наша жизнь» газет увертара.
У предприятийыште ик гана чийышашлык хирург халат деч посна эше специализироватлыме операционный комплектымат ургаш тӱҥаналыт. Тудым торжественно почмаште район администраций вуйлатыше А.Ибраев, «Здравмедтех-М» ЗАО-н генеральный директоржо В.Бурда, «Здравмедтех-Поволжье» ЗАО-н генеральный директоржо Е. Халевин лийыныт.
У предприятийым почмо дене у паша вер лектын. Тидыже район администраций вуйлатыше Альфит Ибраевым поснак куандара. Кызыт тушто Ернур, Оби-Памаш, Элпанур, Алашайке ялла да Параньга поселко гыч 26 еҥ пашам ышта. Мо оҥайже, тыше вургемым ургат веле огыл, ургышыжым ультразвук йӧн полшымо дене ушат, икманаш кӱшыл технологийым кучылтыт.
Предпритяийын пӧлемже-шамычат пашалан йӧнештарыме улыт. Ик кече жапыште 1200 наре изделийым ыштен шуктат. А материалжым эсогыл США-ште, Саудовский Аравийыште налын кондат. Ончыкыжым кечеш миллион наре изделийым ыштен лукташ шонат. Сатужым уло Россий мучко колтат.
С.НОСОВА
Снимкыште: у предприятийым почмо годым.
Фотом «Наща жизнь» райгазетын сайтше гыч налме.
