УВЕР ЙОГЫН

У оралте черетым пытараш полша

Федеральный бюджет гыч Марий Эллан Красный Стекловар психоневрологический интернатын малыме у корпусшым чоҥаш средствам ойырат.

Тидын нерген эше декабрьыштак, Федераций Советыште Марий Элын кечыже-влак эртыме жапыштак, кутырен келшыме улмаш. А кодшо кечылаште Россий правительствын элысе 17 психоневрологический интернатыште тӱрлӧ оралтым чоҥаш 2 млрд. теҥгем ойырымыж нерген пале лие. Тиде паша «Демографий» национальный проектын «Кугурак тукым» («Старшее поколение») проектшын кышкарыштыже шукталтеш.

Марий Эл деч посна кӱлешан социальый объект-влакым Крымыште, Хакасийыште, Тываште, Татарстаныште, Якутийыште, Мордовийыште да моло регионышто чоҥат да 2019 гыч 2021 ийла марте пашаш колтат.

«Республикнам федеральный кӱкшытыштӧ колыныт да тудлан полшаш лийыныт. Красный Стекловар интернатыште 100 веран малыме у корпусым шукертак чоҥаш кӱлеш ыле, вет ончычсо оралте чот тоштемын, тылеч посна стационарыш логалме черетат кушкын», – рашемден Марий Элым вуйлатыше Александр Евстифеев.

Мут толмашеш, Красный Стекловар психоневрологический интернатыште у корпусым чоҥымо дене стационарыш логалме черет пыта. Тылеч посна тӧнежын коллективше социальный услугым палынак сай кӱкшытыштӧ пуаш тӱҥалеш.

М.ИВАНОВА.

 

Опубликовать в Одноклассники

Добавить комментарий